【同盟】陳山聰指揮狙擊手開槍又派膠 Sniper要用紅外線瞄準？
撰文：溫菁莉
出版：更新：
千呼萬喚嘅TVB劇集《同盟》昨晚終於首播喇，唔少觀眾都好期待一眾《城寨英雄》班底今次有咩火花，但有部分觀眾就有些失望而回。其實睇返第一集，就已經有唔少爆破場面，明明劇情好驚險，但觀眾就問TVB點解又派膠，事緣有一幕槍戰鮑姐飾演嘅令熊被狙擊手暗殺，身為其保鑣嘅歐瑞偉好快就見到，之後隨手用手槍射中狙擊手，呢招返狙擊其實都幾唔make sense。而劇中有爆破場面嘅場面，都用慢鏡似乎係想營造電影感嘅效果。BTW歐瑞偉咁勁，唔知最後佢會唔會劇集係final boss呢？
歐瑞偉一槍就射中狙擊手，幾勁。
+2
估唔到鮑姐唱歌都幾好聽。
《同盟》今次就特別邀請鮑姐加入，好多人本身都好期待，不過有觀眾就嫌鮑姐講對白好生硬，還提議TVB應該揾惠英紅飾演令熊一角。但當然有人都覺得鮑姐好戲嘅，大讚佢一人分飾薇姨同令熊兩角，演技上要做到好唔同係難事，但鮑姐都拿捏得好好，仲話今年年尾頒獎禮拎視后無難度。(觀眾係咪忘記劇集仲有胡定欣呢?!)對於拎視后一事，鮑姐日前出席宣傳活動時就講過，「唔好喇，要俾機會年輕一輩，我無謂阻住地球轉喇！」但相信最令人意外嘅，一定係鮑姐大開金口唱徐小鳳的《風的季節》，仲要全程keep住個小鳳姐腔，都幾有新鮮感！
陳山聰御用的狙擊手用紅外線槍射擊敵人，嗯...乜有狙擊手用紅外線槍咩？
另一幕，就係飾演鮑姐嗰仔嘅陳山聰係貨倉發現自己公司有同事做販毒分子，就暗中預備一班狙擊手暗殺對方。咁就出事喇....因為班狙擊手用紅外線槍，乜狙擊手唔係暗地裏殺人咩,用紅外線咪會被人發現，好似唔係好合邏輯。另外，劇集係呢場戲就用交響樂代替槍聲，講真新意就無乜，而且陳山聰啲動作個畫面又唔係太配合，夾硬加埋音樂更是有畫虎不成的感覺。雖然有膠位，不過都睇出tvb今次確實有誠意，要讚下嘅！