陳奕迅唱爆玻璃杯神技網上瘋傳 工程學博士：高音頻率較易爆
撰文：洪曉璇
出版：更新：
香港地方細細但卧虎藏龍，單係講唱得之人，EASON陳奕迅絕對榜上有名。論唱功，究竟巨肺勁定高音醒? 近期EASON忙住北上，PART住周杰倫、那英、劉歡擔任內地歌唱比賽評審，坐定定講評語，同周董鬥嘴攪氣氛，技癢時走到舞台上扮走音獻唱，輕輕鬆鬆又搵到真銀﹗不過並非每個節目都如此輕鬆就能袋走酬勞，EASON就曾經於綜藝節目中，被要求表演”特異功能” --- 唱爆玻璃﹗
Eason表演前先聽玻璃杯震動聲音。(片段截圖)
最近Facebook流傳一段「陳奕迅獅子吼神功震驚觀眾 歌聲震碎玻璃杯！」短片，可以見到Eason先在耳邊敲玻璃聽聲，然後將玻璃杯放在喇叭前面，唱出《愛是懷疑》副歌「Because愛……」然後玻璃杯就應聲爆開，連Eason自己也嚇一大跳。
翻查紀錄，原來這個片段是Eason 2012年，參與內地綜藝節目《快樂大本營》其中一個單元綜藝風向標，事隔多年片段忽然又再於社交網站翻hit，實在令人費解。唱歌唱到爆玻璃Eason其實並非第一人，香港代表起碼仲有一個，就係莫華倫，在1993年歡樂滿東華慈善晚會上，一曲《啊！我的太陽》竟然震爆玻璃杯令人印象深刻。但到底原理何在？
香港01訪問香港理工大學機械工程學系副教授黃偉安博士，他解釋一般玻璃表面有微細裂痕，當聲音頻率與玻璃裂紋配合，聲音會傳入玻璃產生共震，當震動大到足以令裂紋增加，玻璃就會碎裂。至於為何唱出高音才有機會爆玻璃？黃博士指「因為玻璃裂紋好細，需要嘅頻率相對較高，人體發出嘅高音甚至係聽唔到而令玻璃爆開。」
原來人體發出聲音需要與玻璃震動頻率配合，難怪Eason表演前先敲打玻璃杯細聽其頻率。高音又唱得即時諗起經常洗版嘅巨肺GEM鄧紫琪，唔知佢又會唔會挑戰下唱爆玻璃呢？