麥明詩撐雷莊𠒇奪冠 網友反擊群情洶湧
麥明詩一向敢言又有point，深受觀眾同網友欣賞，faceook有18萬人like，不過前年當過香港小姐冠軍嘅佢，今日喺facebook撐今屆港姐冠軍雷莊𠒇（Juliette），卻被網民炮轟，群情洶湧，聲言再撐Juliette就唔再like佢。麥明詩回應《香港01》時話：「都有啲建設性批評嘅！」
今屆港姐冠軍雷莊𠒇自當選以來負評排山倒海，加上佢對網友嘅言論：「I don't care」形象直插谷底。而麥明詩今日喺facebook就貼咗張照片－－3屆港姐冠軍麥明詩、馮盈盈同埋雷莊𠒇一齊喺錄映廠嘅合照，而麥明詩更寫咗一大段文字引起好大迴響：「昨晚有幸認識Juliette，她是一個很有夢想的女仔，她那份單純的信念，讓我對她有點改觀（之前的確被一些報道影響到）。」
佢又用李嘉誠同王祖藍嚟做例子：「李嘉誠黐膠花時一定沒人猜到他會做香港首富，王祖藍做兒童節目時大家都想不到他會成為大中華一線紅星。」麥明詩同時寫埋英文版，但英文版係用蘋果教主Steve Job同神奇女俠Gal Gadot做例子。
麥明詩fb全文及網友留言反駁：
然後講到Juliette：「可能大家未有機會見到她拼搏，但有夢想是第一步，與其質疑她不自量力，倒不如質疑自己為什麼不再相信夢想。」
呢個po一出，網民一窩蜂留言，而且一反常態今次幾乎全部係鬧，有麥明詩嘅粉絲甚至講明唔再like佢。
網友反駁好激烈：「我第一次唔同意你嘅講法，而且有啲失望。」、「佢追夢嘅過程就係阻咗好多其他人高飛，佢乜都敢說出口，唔係因為佢勇敢，而係佢已慣目中無人。」、「係咪因為有人唔識中文，你要寫多次英文？」、「香港小姐沒有理解和尊重香港普通文化的能力及思考文化差異，作為香港小姐稱職嗎？」、「其實由佢講嗰句I don't care開始佢已經注定無運行，我唔知係咪tbb（TVB）叫你同馮盈盈去粉飾太平。」留言已經去到3百幾個，但未見麥明詩回覆。
其實喺港姐決賽翌日麥明詩都有貼文撐雷莊𠒇，但冇開名所以網民冇咁大反應，當日佢寫：「呢個世界從來冇絕對嘅公平，有啲人天生靚啲有啲人冇咁靚……但係同時間，喺每一個機會盡自己嘅努力同腦力，就係對自己最公平嘅方法。」我們致電麥明詩，佢回應：「唔驚破壞我形象嘅！好多嘢要親身接觸個觀感會唔同，冇人係prefect！我講呢番說話係想中和下啫！」
麥明詩話唔會逐一回應網友嘅批評，因為再講對件事都未必有幫助，而且佢話：「有啲係建設性嘅批評！」至於佢點睇雷莊𠒇嘅外貌，佢就答：「獨特囉！俾人記得個樣重要個唔記得佢吖！」而有網友質疑佢係受到TVB壓力所以粉飾太平，佢稱個live節目係TVB意思，但佢自己並唔覺得係粉飾太平喎。