麥紫莉親認拍AV係講大話 fb發文道歉:欺騙大家係我錯

撰文:溫菁莉
出版:更新:

正所謂「位並唔係咁上的」,相信由7月講到8月聲稱要到日本拍AV嘅麥紫莉(chili)就係最好人辦喇。事關昨日chili接受訪問時表示,已與公司已經解約,並透露講足兩個月都未能成事嘅「赴日拍AV」,只係舊公司谷自己上位嘅一條橋,強調自己無可能到日本拍AV,因為過唔到自己嗰關!

麥紫莉講足兩個月嘅赴日拍AV,原來一切都是套路,根本無呢回事!

麥紫莉指當時都係受公司指示而回答傳媒嘅問題,其實自己根本無一條係想回答,而家人亦一早知道所有事「一切都是套路」。chili7月份出席活動嘅時候,曾透露過到日本拍AV,係希望可以賺更多錢幫助患有腎病嘅媽咪籌錢醫病。今次與舊公司解約,係因為Chili多次被拖欠酬勞,對方亦好大方咁俾自己無條件解約。提到早前頻頻出席活動,咁有無真係如佢所願賺更多錢呢?麥紫莉昨日接受訪問時就指,赴日拍AV事件公開報導後,有出席過4嗰活動但酬勞總數都無1萬蚊。

大家又接唔接受麥紫莉嘅道歉呢?
+10
chili話唔會拍AV,因為過唔到自己嗰關。

問到當時點解接受舊公司提出以「港產AV女優」成名時,麥紫莉就話當時自己已出道2年,但仍然寂寂無名,收入首當其衝無增長,所以先決定博一鋪同舊公司「呃」大家咁話,強調自己真係為賺錢,咁做先會紅,並唔係有心呃讀者!唔知大家又接唔接受麥紫莉嘅道歉呢?

終於可以講返自己想講嘅嘢,終於可以做返自己,終於可以唔使任人擺佈,終於可以理直氣壯話俾大家知我唔會拍AV。
我知道欺騙大家係我錯,我唔可以推卸責任,當初我的確係喺知情嘅情況下,一次又一次咁講大話。但係當我脫離呢個珈瑣,我恨不得馬上走出嚟向大家道歉,因為我痛恨呃人,亦痛恨俾人呃。
當初公司提出呢個提議,雖然講明只係一個綽頭,但我無即刻應承,因為我諗唔到點樣同屋企人解釋。後來公司話只要我有人識,就可以搵到好多錢,而且會有一個靚嘅收科!結果?同屋企人鬧交,搵唔到錢,出街、上網都俾人指指點點,壓力大到瞓唔到覺,每次見記者都好怕被問幾時出發,因為公司無話過俾我知點收科,亦都無諗過要收科,最重要係,的確係有人認識,但全無形象可言。我後悔了。
我希望大家可以原諒我,原諒我嘅不智,原諒我對大家嘅欺騙,原諒我咁遲先坦白,原諒我幻滅咗大家嘅夢。對唔住。