《後生仔傾吓偈》開播以來一直話題多多，最新一集雖然馮盈盈缺席，請嚟同屆亞軍兼最上鏡小姐劉穎鏇（Tiffany）擔任嘉賓，同陸浩明、麥明詩以及一眾大學生討論，一樣大受歡迎。今集主題圍繞校園風頭躉具備條件，每間學校總見「風頭躉」學生被封為「男神」、「女神」。要得到「神級」封號，要不容貌超群，要不智勇過人，否則難以悅眾。Tiffany既是「最上鏡小姐」得主，又是籃球健將，不過佢就話自己絕無「女神」光環。

Tiffany於美國出世及長大，自小熱愛打籃球，6號提起Tiffany於16年參選港姐時，資料寫住佢以前係洛杉磯湖人女子大學隊成員，Tiffany即時高呼冤枉要澄清呀：「我啲中文差到一個程度，你講嗰時我淨係識答係係係，返到後台先有人同我講，知唔知頭先話自己係打湖人隊，嚇我一跳。」美國NBA極受歡迎，Tiffany亦指母校籃球隊成員大多係校內最受歡迎人物。

有睇開NBA比賽嘅朋友都知，休息時間會有啦啦隊表演，就好似電影《歌舞青春》般養眼，Tiffany即時爆料，原來美國唔少男仔唔一定入籃球隊，反而會爭住加入啦啦隊：「好多男仔鍾意追求啦啦隊員，特別喺外國，同埋d男仔仲會爭住加入啦啦隊做Base個位，點解要加入呢？因為可以托住D女仔，成日向上望，同埋建立感情。充滿男子氣概咁叫女仔可以相信佢。」麥明詩即時搭訕話：「Wow﹗The view is really good up there﹗」哦，明白晒啦﹗