【壹號皇庭】歐陽震華為慳錢 自爆瞓無綫廁所：凍咪縮隻手入衫
撰文：溫菁莉
出版：更新：
最近有唔少深夜煲劇迷每晚12點，都會乖乖坐定定留在家中重溫返25年前嘅熱播劇集《壹號皇庭II》，除了睇劇情之外，當然係睇一眾巨星未紅時嘅演出。而昨晚(24日)由芷珊姐姐主持嘅《最佳拍檔》，就邀請了歐陽震華(Bobby)，陶大宇及蘇永康做嘉賓，大談拍攝經過之餘仲分享未紅嘅經歷。Bobby就話入行幾年依然做緊「2-7線」嘅演員，即係咩角色都可以做，期間更試過有PA揾佢做嫖客，被對方嘲諷：「啱你啦，有女攬！」
檯上嘅架原來係bobby提議要用，因為唔想背咁多劇本！
Bobby近年都被外界稱為TVB「收視福將」，因為佢一有新劇出街收視必定高，原來當年Bobby都曾為自己嘅前途擔心過，甚至想過轉行。Bobby透露年輕時家住西環為了慳時間慳車錢，有段日子都在當時還在廣播道作總部的TVB裏的洗手間度過，「瞓過無數咁多晚，木人巷啲金屬椅好凍，就匿去洗手間啲椅瞓。如果凍，咪縮住手係T-shirt入面，咁就瞓咗好多晚。」
鄧特希係節目中亦有講到點解當年要請歐陽震華，陶大宇及蘇永康拍攝《壹號皇庭》嘅原因。
幸好，當時遇到鄧特希監製的劇集《壹號皇庭》開拍，才令Bobby真正變一線小生，「因為全部演員無一個係一線，全部都係二線頭，二線尾，我地一直都好浮浮沉沉。即係如果你搵劉德華做，就會全部戲份都落係佢度，呢嗰就係鄧特希唔想嘅。」Bobby透露《壹號皇庭》去到第三輯就開始飛紙仔，「全部結案陳詞都係飛紙仔，拎埋嚟係熱架。」他其後表示拍攝第一輯時仍然會背劇本，但到第三輯Bobby就開始唔睇住劇本讀，「嗰陣我同佢（鄧特希）講，我識d律師結案陳詞邊會記得咁多嘢，全部都係寫低之後讀，不如道具手足幫我整個架，估唔到佢（鄧特希）真係信我！」唔知觀眾又睇唔睇得出呢？