【老表，畢業喇】郭晉安爆金句：老師教你做人，名師保你平步青雲

王祖藍費盡九牛二虎之力，說服蔡瀚億拍劇，飾演富二代嘅佢絕對係全劇亮點之一。

《老表》系列再度回歸，雖然萬綺雯、王菀之、張敬軒因為檔期問題未能參與，但一班新血蔡瀚億、鄭欣宜、林欣彤、蔡少芬都集集有驚喜。就大家所見，王祖藍喺之前嘅宣傳片上，自嘲《老表》製作輸《使徒》幾十條街，又指「流」景只得大台先搵到，原來除大台外，Janice Man、連詩雅亦係被抽水對象之一。而劇中不少金句。亦都好值得大家反思。

為人師表嘅蔣志光試過唔見考試卷，又試過宿醉上堂教書。不過，佢亦都有正義一面，就好似第二集時，佢會為教育工作者發聲：「你知唔知幾多老師做到病、做到嘔、做到抑鬱、到要跳樓。」

《老表，畢業喇！》以教學為題材，貼近現今具爭議性的教育問題，首集會講到郭晉安本為寄宿學校的校長，雖然殺校令佢快將失業，但佢對住一班劣質學生時，依然係春風化雨，派成績時更不停拋金句安慰大家。「染金毛都可以讀到中文，有紋身嘅都可以讀到通識。」、「老師係教你點做人，名師係保你平步青雲。」郭晉安之後就會加入胡楓及羅蘭創所辦嘅專上學院「香港燦爛學院」（港燦）做校長，並降服蔡少芬飾演嘅虎媽公關。見到全世界都要贏在起跑前，為學位而爭崩頭，郭晉安就會好處之泰然咁話：「搞活動同同學合作，都係一種學習嚟嘅，學習唔一定要畢業嘅。」

林欣丹同蔣志光呢對父女雖然既係同學又係教育者，但大家嘅理念完全唔一致。

出道以來主力發展電影嘅蔡瀚億（BabyJohn），獲王祖藍力邀加盟《老表》，劇中飾演富二代嘅佢，講嘢經常中英夾雜，例如第二集佢打算身體力行支持爸爸（秦煌飾）嘅慈善活動，並表示：「我想去一啲poor village做義工，去採訪嗰啲好窮好窮嘅family。」不過，最正嘅係佢之後喺fb撰文打算表揚秦煌，但卻誤用「 RIP」而搞到大頭佛，令外間以為其父離世，成件事似在暗笑連詩雅早年將「RIP」寫為「Rest In Piece」，而據知，「RIP」呢個gag位，係由王祖藍親自度的。而係RIP後，蔡瀚億就被秦煌安排到「港燦」受訓。

蔡少芬表面上係「港燦」嘅宣傳公開，但其實質工作係幫秦煌監視蔡瀚億。

劇中飾演優才生嘅林欣彤，夢想係成為一位補習老師，於是佢報讀「港燦」課程，並同飾演佢爸爸嘅蔣志光做同學。對於現今教育制度，Mag極有自己的睇法，好似喺第三集，佢會話：「。如果香港教育制度有問題，應該改變，而唔係離開另覓更好，唔好淨係識得抱怨the city is dying。」到底係暗寸《天與地》定係純粹抽水？

欣宜喺劇中係個非常崇尚古惑仔文化嘅鬼妹仔，更一心想推廣古惑仔主題樂園，性格火爆嘅成日將「打到你變locker」掛嘴邊。