【今日睇真D】《解剖外星人》作假　余詠珊：當時用咗過百萬買片

大家仲記唔記得多年前亞洲電視節目《今日睇真D》所播放的「解剖外星人」（Alien Autospy）片段？當年播出後曾經成為全城熱話，更將亞視的收視推上歷來的高峰。不過今日就有報道指拍攝《解剖外星人》的梅拉里斯（Spyros Melaris），竟然在一場棟篤笑上承認該片段中的外星人是假的，當時只在一個住宅單位內進行拍攝，更以購自肉檔的牛羊內臟充當成是外星人的內臟，並且只在一個住宅單位內拍攝。他說：「對我而言，這（影片）只是一個笑話，有點好笑而我也上了一課。我想說事件中的很大部分事情都使我感到後悔，我低估了其他人的反應，現實是不少UFO社團都視這段影片為UFO及外星人的證據。」

嘩，何止是梅拉里斯自己上了一課，相信亞視都一樣，雖然亞視已經唔存在。當年余詠珊在亞視擔任資訊科經理，就是她為亞視創作了《今日睇真D》這個節目，《香港01》記者就致電訪問了她對解剖外星人片造假的睇法，她坦言未看過有關報道，當得知原來拍片人梅拉里斯親口承認是假感到驚訝：「吓？當時好震撼，條片我哋直情係要攬住返屋企，好驚會唔見，好緊張㗎。我睇嘅時候都睇到好驚，唔係好敢睇。我信係真㗎，直至你依家講畀我知之前嗰刻我都仲信緊。當年條片係好秘密，我哋好辛苦，好艱難先搵到返嚟。（用咗幾多錢買入？）唔記得exactly用咗幾多錢，但都要十幾萬美金。」即是要港幣逾百萬，用過百萬買條假片......

余詠珊強調自己一直信以為真：「成件事過程好嚴謹，我哋用咗幾個月時間，聯絡同接洽咗好多，先買到條片，所以我唔會覺得係假嘅，咁難得到又咁貴喎，我當係真㗎，而且羅茲威爾係一個發現有關外星人資訊重要嘅地方，我都信有外星人，呢個宇宙唔會只得地球人。當時買呢條片無諗過爆唔爆，淨係據聞有條咁嘅片，我哋節目部就去搵賣家，花咗好多心機時間，千辛萬苦先至搵到。」

咁究竟余詠珊又怎樣去sell這條片給高層？原來買入這條片並非她的主意，她也是跟order辦事的，幕後話事人是當年於亞視任職行政總裁的李寶安。余詠珊說：「唔使sell畀高層，係李寶安佢叫我哋去搵條片嘅，佢下咗命令，所以我哋先咁努力去搵。」而片段播出後亦令亞視的收視暴升：「我唔記得有幾點收視，好似最高係有29、30點，係上過呢個數。」

至於花上過百萬去買假片還被騙了這麼多年，可會覺得自己被人搵笨了？余詠珊說：「呢個世界有好多嘢唔係講真定假，我當係真咁去信，再去探討下，當時都有存疑，但我會覺得多數係真嘅，咁咪同觀眾去睇下，真假都唔知，所以一齊去睇下，既然咁難都搵到又咁貴，咪畀觀眾睇下，再自行判斷係真定假。我哋啲同事入面，10個有3、4個都覺得係真嘅，我自己都感覺係真。睇呢段片對香港人嚟講係一個難忘嘅經歷。我記得當年有個警察喺街見到我哋，話佢特登同同事調更嚟睇，以為得一集，點知原來播成個禮拜，鬧鬼我哋話拆開晒嚟播，搞到佢無得睇。