【老表畢業喇】蔡少芬兩個寶貝囡小學面試全靠張晉：佢叻到不得了
「我唔係老虎嗰虎而係辛苦嗰個『苦媽』！」蔡少芬笑言。做人父母甚艱難，如果本身職業是藝人更是。蔡少芬（Ada）最近在劇集《老表畢業喇》中就飾演一名「虎媽」，現實中育有兩名寶貝女楚兒及信兒的她，表示自己在香港如無工作，一定會親自接送兩個女兒上學放學，「學校有咩活動會盡量配合她們。同埋會安排課外活動，因為小朋友有好多精力，俾佢地瞓一陣就好精神。」
攝影：張浩維
服裝： Laurel
髮型：Barry Tran@Hair Corner
場地提供：CÉ LA VI
蔡少芬指會根據兩名小朋友的興趣去安排課外活動，她笑言：「又要觀察她們的興趣又要幫報名，安排好時間，所以變得好辛苦。有時她們學完課外活動之後，仲有好多精力，夜晚又唔肯瞓自己嘅床，去完toilet就爬上你張床，大女最鍾意用手插落我背脊玩，搞到我夜晚未必瞓得咁安落。」雖然一整天的時間表都排得密密麻麻，但看得出其實Ada也樂在其中，「又唔想她們同工人姐姐瞓，因為唔想佢唔獨立，所以點都要捉佢地過去自己房瞓。夜晚又驚佢地凍，幾眼瞓都要睇下佢地有無蓋被。」
原本為女兒選擇入讀傳統學校的Ada指因為受朋友影響之下，所以安排兩名女兒轉讀國際學校，「我都係傳統學校出嚟，覺得教育所有嘢都好好。其實咩學校都唔緊要，最重要是老師愛她們，同學之間都好有愛嘅一間學校。」Ada指學習好靠天分，係唔讀得就係唔讀得，她笑言，「睇我就知。講真一開頭係有啲驚，始終國際學校俾我感覺係太freedom嘅學校，我怕捉唔住佢，驚佢同我講：『自己人生我搞掂咪得咯。』有好多朋友嘅仔女都讀過呢間學校，無論道德觀價值觀都同聖經一樣，亦都係我價值觀。咁佢地去面試，對方又肯收佢，無謂關呢度門。」
提到近年有不少家長為了仔女可以入讀心儀學校，面試前都費煞思量，安排子女參加各式比賽爭取獎項，增加獲心儀學校取錄的機會，問到Ada帶女兒面試時有無奇遇？她就指當時由老公張晉全權負責，「咁啱當時我要到外地工作，面試當天是爸爸陪她們， 所以我完全無壓力。」面試完畢後，相隔幾天學校就錄取她們，Ada指當時都有問老公面試表現點，「Daddy話乜事都唔知，一入到學校分別帶她們到不同的課室，因為佢都要面試。佢有同我講返老師問咩問題點樣答，我聽完之後都係咁讚佢！」咁問題係咪真係外界所講咁難呢？Ada就不認同，「我又覺得唔難，都係問點解要搵呢間學校？有咩期望？學生同老師之間有咩唔舒服，點處理？當時Daddy答得好好，叻到不得了。」
Ada疼惜兩名寶貝囡，咁係咪會完全無鬧唔打呢？Ada就指以前一遇到囡囡太頑皮的時候才會體罰，「有一枝棍，由細打到大，但講真有幾多次會出到呢枝棍呀。我已經有2-3年無掂過。」Ada表示以前曾經看過一本書，「有時唔體罰小朋友，佢地就會唔清醒，要俾佢地記住。當然是事件好嚴重的時候，咁當時我就買咗個得個聲好響，但其實唔痛嘅那種棍。有次大女就唔聽話，錯咗3次依然繼續犯錯。真係唔得喇，就同佢講，『媽媽要拎棍嚟打你，如果唔係你就唔記住。」我就叫佢拎隻手，就同佢講打3下，佢就真係記住咗。」
Ada的女兒今年分別6歲同4歲，講到她們是否知道父母嘅職業是演員時，Ada就指，「佢地唔知咩係演員，但就知阿爸阿媽係街會有人搵佢簽名影相，會問點解會有人搵你簽名同影相。一開頭我唔想答，你行開喇。而家長大就會同佢講。」但最好笑莫過於女兒一直以為媽咪是警察，「原來佢讀K2嘅時候，有份功課要貼警察嘅相，我就上網下載自己在《陀槍師姐》個樣，所以女兒就以為我係警察。 而家有同佢地講，媽媽唔只做警察，又會做醫生律師，佢地就會嘩！」其後Ada亦分享了一件趣事，「最近帶佢地去迪士尼，佢地就買咗本薄可能見到其他人咁做，就走去搵卡通人物簽名。我就問點解搵佢地簽名？因為我鍾意佢地咯，我就係同佢地一樣，所以咪搵我簽名囉。哦！你就係蔡少芬！哦！張晉 ！」
而今次拍攝完在TVB最後一部劇集《老表，畢業喇！》終於功成身退，與TVB正式結束賓主關係，Ada則表示，「其實咁樣係好嘅，會自由啲，所謂嘅自由係我唔需要特別請假，因為拍內地劇集的話，如果有份約，會比較約束，而家就自己同經理人傾咁樣就得，唔需要出信。」接下來，Ada又要飛往內地拍攝劇集，問到會唔會同囡囡變相少見面，她笑言，「好奇怪，我拍劇嘅時候老公就會放假，兩個囡有時間嘅話，佢就會帶埋佢地嚟探我。但有時兩個囡無放假，我就會飛返香港陪佢地一陣再返去。」