【後生仔傾吓偈】麥明詩都想買樓：有時好攰返屋企都要交貨㗎嘛
今時今日喺香港，想上車買樓做業主，實在談何容易，大學畢業出嚟搵2萬蚊1個月已經算好叻，莫講話去旅行，扣除交通食飯俾家用，即使每個月儲到1萬蚊，都起碼要5年時間先有足夠首期。十優港姐冠軍麥明詩而家住緊逾千呎3房單位，佢都坦言希望搬出嚟住：「返屋企都要交貨㗎嘛。」
香港人典型嘅一條路，讀好啲書，大學畢業搵份好工，拍拖結婚買樓生小朋友，麥明詩其實已經贏在起跑線，新一集無綫節目《後生仔傾吓偈》圍繞年輕人置業，陸浩明問佢希望搬出嚟嘅原因時，她忽然表現得好灰心：「（咁你想搬出嚟，除咗Free啲係咪想同居？）（麥明詩靜3秒）暫時未有呢個逼切需要。我18歲嗰時都以為自己24歲結婚，我到咗25歲連拖都唔想拍。（人生拍拖買樓都係為咗有家庭啫）而家拍拖9成都散㗎啦，何必嘥時間呢？」都係25歲啫，做乜忽然好似對感情完全失去信心一樣呀……
「讀大學時住宿舍一個人一間房，好享受無拘無束，有時返屋企都要交貨㗎嘛！（對屋企人交咩貨呀？）即係同佢地傾下，應該嘅但有時都真係攰嘅。佢乜都唔知反而唔知點問，即係唔會問我阿哥今日條腸割成點呀？但就係知少少睇咗《東張西望》，你拍新劇呀邊個做主角呀？」
麥明詩自參選港姐入行以來，都知道佢來自中產家庭總算生活無憂。麥明詩就透露而家住緊逾千呎3房單位：「3房加工人房，連工人住咗5個人，父母係典型置業夢，我地移過民，回流返香港本來住4、5百呎，之後先愈換愈大。以前一直我都同工人同房。到早幾年我同哥哥讀緊大學，父母覺得未來經濟狀況都樂觀，哥哥做醫生佢地又無諗過我會入行，以為我會搵份穩定嘅工作，一定會供得起……」
的確，大家曾經對麥明詩放棄做律師，選擇入娛樂圈大感不惑，原來係因為佢明白，律師收入增加幅度，其實比藝人少好多：「當時大學住宿舍，父母會俾零用錢喺外國生活，覺得好寫意，唔使為五斗米而折腰，但之後發覺無安樂蝸，好似住天水圍返將軍澳，諗係搭西鐵轉地鐵再轉巴士，日日6點起身返工，到屋企已經10點，變相都會希望改變生活質素。」