【使徒行者2】周柏豪不停殺人？　黃翠如懷疑樂少真正身份

《使徒行者2》話咁快今日就已經係最後七集，下星期已經係結局篇，所以劇情都已經進入到大直路。黑警Ben Sir被槍殺，速黑浴火重生加入民間刑事情報科，歡喜哥開始設局同魏德信抗衡，卓sir亦開始帶領樂少、梅姐和徐天堂加埋一班新加入的成員暗中調查黑警。誰不知呢一堆黑警竟然慢慢被神秘人殺害，搞到黑警大家姐Madam Cheung都十分擔心，亦因為咁先同Ben Sir決裂，仲試過想假借神秘人之手除去Ben Sir。

以下內容有少量劇透，逃生門在此。

咁究竟呢位神秘人係邊個？如果眼利的觀眾有留意此人的身形，應該會覺得佢有啲面善。今集就講到梅姐故意設局引樂少去殺黑警，點知樂少真係好天真咁相信咗佢，繼而被發現原來佢就係連環殺黑警的兇手。要知道作為一個臥底，本身有條界線係唔可以超越，就係殺人，而樂少一係唔殺，一殺就已經殺咗三個，已經完全超過晒做臥底嘅界線，唔通佢已經放棄咗做警察？

其實早前已經講過，有一集因為樂少隻手受傷，所以梅姐便好心地幫他包紮傷口，當梅姐問他喺學堂嗰陣唔係學過急救咩？樂少當堂唔識點答，然後就話做古惑仔咁耐，唔記得晒喇，其實佢可能根本就真係唔入過學堂，臥底都只係佢扮出嚟。今日呢集講度佢係要為一個人報仇，除了Pak-key之外，原來佢仲有一個原因要接近黑警，就係呢個被佢埋葬嘅人，咁究竟呢個係邊個？劇情好快就會揭曉了。