有位巨星原來勁念舊 用緊8年前出產推蓋手機
撰文：洪曉璇
出版：更新：
大家手上用緊嘅電話，記唔記得幾時買？個個都一年換一次機追新款追功能，鬥快買到iPhoneX嘅年代，原來仲有人非常念舊。古天樂最近出席生日會，於台下接聽電話，被Fans影低先發現，原來佢仲用緊一部推蓋手機﹗記者憑模糊手機相片搵到型號，居然係一部8年前出產嘅手機，仲要連WhatsApp都裝唔到﹗
古天樂早前於生日會台下掩住個嘴密密傾，大家焦點去左佢部推蓋電話。(微博圖片)
根據照片中呢位巨星用緊嘅手機背面設計以及鏡頭位置，相信應該係2009年發售嘅Sony Ericsson W995。呢部手機主打音樂功能，於2009年5月22日開始發售，為Sony Ericsson 2009 上半年旗艦手機。810萬像素相機，前置鏡頭得30萬像素。無錯，古天樂手中的電話，應該係唔可以自行裝apps，即係連Whatsapp同Facebook都用唔到。今時今日呢部機都真係算古董啦，事關Sony Ericsson喺2012年已經改名，宜家想買番都好難，睇嚟古仔都未放低佢個份對音樂嘅執著。
照推斷古天樂用緊嘅係呢部09年出產嘅Sony Ericsson W995。(網上圖片)
好多網友見到古仔居然用部咁舊嘅手機，都覺得嘖嘖稱奇，笑問佢係咪諗住喺古墓入面使用。不過記者問過手機專家，估計古仔除咗係念舊，可能有更深嘅考量。一方面係呢類電話功能較簡單，保安方面比較完善，無得安裝APPS較少機會被追蹤，黑客入侵嘅機會亦較微；另一方面就係通話質素較佳，用開智能電話都知道，要真係打電話好多時都會沙沙聲收得唔好，反而同一張sim卡用舊機都收得清晰啲。不過講真係古仔又點只一部手機，早兩日發微博就用iPhone 6S Plus，係就係智能電話不過都已經係3年前產物，真係應該讚下佢環保又念舊。
+4