【爸爸去哪兒】陳小春衝過去想錫小泡芙 嗯哼呷醋O晒嘴：幹嘛呢
撰文：李妍樺
出版：更新：
大陸綜藝節目《爸爸去哪兒5》大家最鍾意睇就係惡爸陳小春同暖男囝囝Jasper之間嘅溫馨互動，但其實陳小春同劉畊宏個囡小泡芙呢一對仲好睇！由第一集開始，佢已經對小泡芙虎視眈眈，成日都讚佢可愛，不時透露自己如果有個好似小泡芙咁可愛嘅囡就好喇，但可惜之前應采兒上節目講過，陳小春基因太強，生囝似佢就冇所謂，但如果生囡都好似陳小春就唔係太好喇。
陳小春一對住小泡芙就會變成慈父樣。（網上截圖）
陳小春雖然成日呼喝Jasper，但對住小泡芙佢就完全唔同晒，之前講過佢對住小泡芙個態度會特別溫柔，從未試過唔耐煩，小泡芙做掌上壓，佢就默默咁幫佢拎起衫尾怕整污糟。上集又主動幫小泡芙戴手套，仲親自一對一教佢摘火龍果，真係親生囝Jasper都未試過有咁好享受。
今集陳小春仲誇張，講到一班小朋友係船上面玩遊戲唱歌仔，小泡芙就自薦自己要唱《爸爸去哪兒》嘅主題曲，仲話要唱個快版，把聲超級嗲！頭號粉絲陳小春聽到好冧，好似墮入愛河咁，最後仲忍唔住衝上去攬住小泡芙話：「我想親你啊！」身邊嘅劉畊宏完全反應唔切，而嗯哼直程O晒嘴問陳小春：「幹嘛呢？」陳小春恨囡真係恨到出晒面，唔知應采兒見到呢個畫面會唔會認真考慮為Jasper加添個妹妹呢？
你睇陳小春個樣冧到！（網上截圖）
直撃陳小春衝上去小泡芙度嘅過程：
+7
連嗯哼都睇到呆晒！（網上截圖）