【再親我好媽】江美儀拍《親親我好媽》續集 洩幕後編導大換血

撰文:洪曉璇
出版:更新:

TVB近年慣例,收視理想嘅劇集就會乘勝追擊開拍續集,《使徒行者》、《溏心風暴》、《宮心計》拍完一輯又一輯。不過呢D大製作雲集一線小生花旦,唔係爭產就係勾心鬥角,一係就不停爆破同搵卧底,睇得多真係有D攰,有時小品溫情戲反而更得觀眾歡心。年初嘅《親親我好媽》由不被看好絕地反彈,唔少網民大讚該劇內容夠貼地,道盡一眾港媽心聲,而呢套劇亦準備開拍續集啦。

年初播出嘅《親親我好媽》,江美儀同陳敏之演出受觀眾肯定。(影片截圖)

2017年已經接近尾聲,翻查資料今年TVB黃金時段播放咗大約30套新劇,當中《親親我好媽》可謂成功刀仔鋸大樹,由江美儀、呂慧儀及陳敏之擔正,播出前不被看好被視為炮灰,播出後來個大逆轉受觀眾追捧,獲得網民讚賞內容夠貼地,講中唔少家長心聲,即使自己未做爸爸媽媽,怪獸家長都總有一個喺左近。

其實唔一定要爭產同槍戰,簡簡單單溫情小品都有好多捧場客。(網上圖片)
何廣沛同江嘉敏呢對熒幕情侶大受歡迎,續集好在有得留低。(何廣沛IG)

江美儀喺網上留言話:「《再親我好媽》!?《親親我好媽》!?嚴太回來了!?你們期待嗎?」Hashtag寫上親親我好媽同嚴查向善,正式宣布《親親我好媽》開拍續集啦,其實何廣沛都有分享劇本封面照,從中得知暫定劇名為《再親我好媽》,有心水清嘅網民就發覺,佢地不約而同喺劇名前加圖案或抹走一d字,懷疑續集係咪有機會變成網劇,甚至放到BigBigChannel播放。

江美儀上載新劇劇本封面,令大家發現幕後功臣全部唔見晒。(江美儀Facebook)

開拍續集觀眾就當然期望原班人馬上陣啦,何廣沛同江嘉敏呢日喺IG上載咗一段STORY,見到片段中有影到嚴家全家幅,相信劇集已經拍攝當中,演員似乎都繼續參演,但幕後就似乎大換血啦。《親親我好媽》由關永忠監製,盧美雲編審,不過睇番江美儀上載嘅劇本封面,監製變成李志倫而編審娛成鄭月明。翻查資料李志倫Jacky綜藝節目出身,係圈中著名MV導演,執導超過1500個MV,年初由余詠珊力邀回巢TVB,不過就無執導連續劇經驗,較為熟悉嘅只有《愛情來的時候》其中一個單元。新戲仲可唔可以延續貼地溫情格局呢?睇嚟要等下年播出先知啦。

+2