【禁色令】實施第一日全部女星包到實　龔嘉欣：我本來想露下腰

TVB昨日下令不許女星性感，拍劇就連強姦戲、床上戲都只能用「意會」形式交代，即是踩爛朵花代表畀人污辱，玩弦外之音。而今日就是推行「禁色令」第一天，剛巧就是劇集《跨世代》的宣傳活動，就到港島區的攀石中心玩遊戲。講得玩Game，著得sporty都好正常，不過本來有得健康性感的機會，都因為「禁色令」而被制止了。

驟眼所見，在場所有女演員，包括田蕊妮、李佳芯、麥明詩、龔嘉欣等人全部都著得好密實，就連背心短褲都見唔到。事後都有問過龔嘉欣，原來她之前都有諗住行「健康性感」，她說：「見到呢幾排練到條腰都幾好睇，就想著件衫露少少腰喇，不過今日做運動嘛，所以就由頭包到落腳。」被問到不能show少少身材，龔嘉欣對「禁色令」都沒有太多意見：「始終本身拍劇，都唔會太鼓吹性感。之後如果要性感，我諗都係睇返劇本，睇下有冇需要。」

樂小姐臨時臨急先推行「禁色令」，今個星期日就已經係台慶喇，咁咪即係冇嘢睇？咁又未必，因為有好多女星都訂造咗晚裝，龔嘉欣都唔例外：「改唔切衫喇，因為件衫一早就訂咗。我條裙本身就係一個大露背，同埋下半身都係see through咁。」龔嘉欣仲講笑話，本來身材唔太出眾嘅佢，封胸都可能係好事：「冇上面都可以露下腳，等大家都有啲嘢睇嘛，我對自己對腳有信心。」咁「禁色令」對佢嚟講，仲著數！