【開心速遞】劉丹迫屋企人講英文要罰錢　次次一千幾百好過去搶

無綫劇《愛‧回家之開心速遞》昨晚播出的一集「不能說的英文」，相信一定勾起了大家的集體回憶，就是那些不論你是自願又或是被迫，都實有玩過的「唔准講咩咩咩」罰錢遊戲喇，玩得最多應該是在學校或者公司。劇情講以劉丹為首的熊家上下，甚至不是熊家的人，都一律要參加這個「唔准講英文，只准講廣東話」的遊戲，仲要不止限於屋企，如果講一個英文字就罰單$100！無錯，是$100一個英文字，好貴呀！一家人使咩玩到咁大呢？

以前玩開通常都是罰幾蚊至$10左右一個字，邊有好似熊家咁罰得咁重，直情好過去搶呀！所以熊家的人在劉丹的魔爪之下，隨便罰一罰都一千幾百，好快已經被罰到幾乎連食飯的錢都無，呂慧儀更誇張到因為要講公事電話而被罰錢逾5萬大元，最後仲要寫欠單，好陰公。不過他們全部都是有品之人，願賭服輸，一犯規被罰錢都會即時繳出罰款，絕對不會賴皮，所以個罰款箱入面有幾千蚊。而大家日常玩過的罰錢game，就好多時都會被走數喇，好少會好似熊家人咁聽話罰咁多錢都乖乖繳上。