【黑人問號】轉載劇集片段 吳尊灌籃神技嚇窒Nick Young

撰文:洪曉璇
出版:更新:

圈中有唔少藝人熱愛打籃球,香港代表有「Fishman Lok」余文樂同周柏豪,台灣有周杰倫、蕭敬騰等,佢地在公在私都同某啲NBA球星交過手,打下友誼賽或拍廣告通常只係點到即止。美國NBA Golden State Warriors球員Nick Young,亦即係大家好熟悉嘅黑人問號主角,轉載咗一段吳尊灌籃動態圖,對佢嘅高超籃球技術只留下三個字:「Oh my god」原來吳尊先係隱世高手﹗

其實Nick轉載嘅灌籃片段,係2008年台灣偶像劇《籃球火》當中嘅片段,呢套戲除咗吳尊仲有言承旭以及羅志祥,就好似《少林足球》以及《功夫灌籃》一樣,呢套劇集以武功結合籃球,幾位主角都有自己嘅絕招。呢次令NBA球星都睇到呆咗嘅,就係「亢龍無悔灌籃」。吳尊飾演嘅無極尊,接到波後於中場起跳,胯下換手運球,再施展疑似輕功水上飄,喺空中橫跨三大步後灌籃成功。點止戲中主持要大嗌「Oh my God」,就連Nick事隔九年見到呢個片段都嚇到呆咗,並附帶一個驚嚇Emoji。

劇中球技效果可以嚇窒NBA球星,《籃球火》當年用上1500萬拍攝,可算非常值得。(微博圖片)
能夠得到NBA球星垂青,吳尊乘機邀請NICK搵日帶埋囝囝,二對二父子檔較量一番。(微博圖片)

最好笑嘅係,吳尊轉載咗Nick嘅留言並話:「Hey, That’s me... OMG! Yes, that’s a comic-style basketball film Hahaa. By the way, I got a 4 yr old son... Let’s do a ‘Father & Son’ 2 on 2 game someday.」除咗同Nick講條片中灌籃嘅正正係自己,吳尊仲介紹自己有個4歲囝囝Max,邀請Nick搵日來一場父子對決,仲附上一張圖片,下半部係吳尊同Max著住球衣企喺場邊嘅背影,而上半部就係吳尊同高比拜仁比賽嘅相片。Nick咁熱愛中國文化,又開微博又不時到中國、香港玩,相信佢都會想認識吳尊呢位新朋友嘅﹗

呢張相,有吳尊有Max,仲有吳尊同高比拜仁打波嘅圖片,挑機味濃噃……(微博圖片)
+7