【闇】暗黑版《Stranger Things》又係唔見仔　加埋時光機玩穿越

套路說穿了其實世界大同，尤其電視劇，無綫劇套套尋親，大陸劇就獨愛穿越，但只要玩得好，舊酒新瓶一樣好睇，好像Netflix新劇《闇》，點讀？暗同音，這套德國劇集，將尋親、穿越玩到出神入化，睇第一集已feel到陣神劇味。

 

《闇》絕對可以稱得上係暗黑版《Stranger Things》（怪奇物語），又係主角唔見咗個仔，不過《闇》再誇啲，連主角老豆後生嗰陣，親生細佬亦失蹤，一個家庭兩代都唔見咗個仔，已經曲折離奇，仲未夠，一開場另一主角老豆吊頸自殺，留下一封遺書，寫明幾時幾日幾分前唔好拆開，嘩！呢啲opening，點頂得住唔追呀？雖然劇透咗咁多，但放心唔會影響追看性，因為你根本唔知劇情點發展。
 

因為套劇牽涉４個家庭故事，各有懸案，亦同《Stranger Things》 一樣，有個幕後組織操控，當然又係研究一啲超自然科學，最後出事嗰啲套路啦，雖然真係同《Stranger Things》好似，但《闇》絕對唔係copy cat，細位做得更仔細，劇情非常複雜，所以睇《闇》真係要打醒十二分精神，因劇組唔會當觀眾白痴，情節去得幾快，亦唔會有少少輕鬆位，全程都好崩緊。

 

雖然真係有好多位可以同《Stranger Things》比較，但放心，你唔會睇到柴台，原來同一樣的材料，失蹤小孩、神秘組織、穿越時空，有啲情節其實無綫劇都有用過，例如失蹤少年回到過去重遇父母，但對方唔知，係咪勁似《爸不得爸爸》呢？不過《闇》dark好多，所以只要肯花心思，同一條橋一樣可以變神劇。其實電影、電視發明超過了100年，有咩橋段未見過？唯有在情節及組合上花心思，而《闇》就係最佳示範。