【溏心風暴3】收視愈來愈低　證明觀眾已厭倦八婆式嗌交

重頭台慶劇《溏心風暴3》進入第二週，估唔到收視繼續低迷，只得21.5點，呢個數綜合，翡翠台電視收視包括模擬頻道、數碼頻道 (81 台) 及 myTV SUPER (機頂盒、APP、web)的直播及 24 小時內追看之收視，簡單嚟講即係計哂，冇得抵賴，而上週22.2點，即係再跌0.7，如果形勢不變，真係有機跌破２０點，溏心第一、二輯平均收視過30點，相信TVB都覺得第三輯會高收，但點解會咁差呢？原因就係觀眾進步咗，但TVB無囉！

溏心第二輯是2008年，９年後今日再拍第三輯，演員又係夏雨、司祺姐等，首先演員絕對不是收視差原因，幾位老戲骨，真係有幾多俾哂你，連潮語都學埋，仲想點？最大問題係劇本，曾經諗過係咪觀眾對爭產劇、爭嘢唔敢興趣呢？唔係喎，美劇、韓劇、日劇、大陸劇都好多爭權，爭地、爭家產嘅劇集，點解人哋咁多人睇呢？因為人哋爭得好睇囉，唔會好似溏心咁，爭產流於幾個女人口舌之爭，妳一句我一句，加啲金句，就覺得好勁，《溏心3》講明商戰，但原全feel唔到，商戰嗰種爾虞我詐，攻於心計嘅劇力，似牛頭角街市順嫂哎交多過爭產。

觀眾喺呢９年裏面，因為睇咗各地劇集，而不知不覺中進步咗，再加上煲劇已不再局限於電視機，而家連老友記都識用手機睇劇，選擇多咗，搭車只得一個鐘頭時間，觀眾寧願睇netflix《王冠》第二季，韓劇《Two cops》都唔睇你《溏心風暴３》啦，係咪因為罷睇TVB問題？唔係喎！《溏心》之前的《降魔的》叫好又叫座，就連成日話唔睇TVB嘅朋友都追睇，咁就已經証明觀眾係聰明，好睇嘅就一定追，唔會因為邊個拍嘅問題。

當然溏心有４０集，可能之後去到２５集後，多返啲大龍鳯、互摑，收視可能會上返，但睇走勢機會就唔大，因為頭１０集儲不到觀眾，係好難煲得起，《溏心３》最大問題係劇本，睇返《降魔的》成功，其中一樣係劇中有伏綫，為了力哥力嫂那場戲，劇組鋪了１１集，觀眾睇到嘩嘩聲，《溏心３》有冇呢啲劇本細節呢？暫時就見唔到，編審可能仲覺得觀眾仲係停留聽對白睇電視嘅年代，劇情越簡單易明就越好，咁就正正反映TVB製作人對時代嘅觸覺唔夠敏銳，如果再用以前嗰套繼續做電視，相信收視只會進一步向下滑。