第二集的《Do姐再shopping》意大利篇已經播出，Do姐鄭裕玲繼續帶住農夫的C君同陸永，仲有蕭正楠一齊於當地參觀逛街。不過同之前那集一樣，笑位欠奉，都係要笑點極低先識笑。而成集最好笑的，絕對是C君！亦可以講是得C君一個有得笑下咋，其他人真係無咩火花，成集都係廁所位，得C君講嘢比較抵死好笑，明顯他是最醒目的一個。

C君仲成日好大膽玩Do姐，亦都係笑位所在。話說他們一行人去到當地一間寵物店，睇寵物衫仔用品時，Do姐就介紹一批手工精緻且顏色漂亮的狗帶，此時C君竟然膽敢叫Do姐：「你試下吖！」難得Do姐一點也沒有嬲豬，仲笑得好開心反擊話：「你試吖！」場面搞笑，亦證明他們其實好好感情，所以先咁玩得。

C君今集仲有不少金句㗎，例如當Do姐在超市拿起一串提子問他們知唔知這是甚麼提子，C君即說：「手提，你手提住吖嘛。」見到寵物店內一些好貴的針織狗仔冷衫，他又話：「我屋企嗰兩隻狗甩啲毛夾埋都可以識一件冷衫，不如我擺喺度寄賣吖。」最後他們參觀朱古力店，見到設計師打造的鞋型的朱古力，C君就話：「雖然佢整朱古力鞋，但佢啲朱古力係滑嘅。」真係佢先諗到。