【壹號皇庭】監製鄧特希籌備律政新劇 親自游說原班人馬上陣
撰文：張嘉敏
出版：更新：
好想睇原班人馬拍《壹號皇庭VI》呀！
無綫經典劇集《壹號皇庭》系列深受觀眾喜愛，就算重播又重播，都keep住有捧場客，第五輯的重播版就快播完，不斷咁翻炒重播，到底會否有機會開拍第六輯呢？香港01記者就訪問了該系列的監製鄧特希，早已離開了TVB成立自家工作室的他說：「目前確係構思緊拍關於律政題材嘅劇，其實一直都有咁嘅計劃，都希望用返《壹號皇庭》呢個班底。我都有同自己好熟嗰啲朋友，好似吳啟華、陶大宇同駱應鈞提及過，佢哋都有興趣，不過都要睇返個檔期，佢哋個個都好忙。」
監製鄧特希坦承已經籌備緊拍律政題材劇集，更期望由《壹號皇庭》原班人馬演出。
雖然大家都好期待有第六輯的出現，但要拍出好似以前咁高質的《壹號皇庭》都有難度，絕非照辦煮碗觀眾就會鍾意，甚至會有反效果，鄧特希說：「再搞就要有全新嘅面貌，唔可以用返以前嗰套，因為時代唔同咗，觀眾都進步咗。今時今日TVB嘅劇係要同全世界競爭，唔係淨係得亞視，亞視都無咗啦。我要搵到一個有信心嘅方向先可以拍得好。」
吳啟華如果夾到檔期都會參演㗎。
至於演員陣容方面，想原班人馬上陣，他當然會親自去游說：「次次我都親自同啲演員去傾，都唔單止係親自咁簡單，亦唔止係用誠意去打動，呢行好現實，必須要有合理嘅條件畀到人，要好多嘢配合，所以都要花好長時間，現階段已經籌備緊。」《壹號皇庭》當年的反應咁好，為什麼又不食住個勢接連拍埋第六輯呢？監製解釋說：「呢個題材喺90年代已經拍晒，當時我搵唔到新方向再可以點拍，再拍都無新意，咁不如唔好拍，轉用其他題材，所以就出現咗《妙手仁心》。」
監製話仲未有機會見到Bobby問佢有無興趣參演。