【溏心風暴3】同唐文龍親熱戲 陳敏之唔想老公睇：老爺奶奶實鬧
撰文：張嘉敏
出版：更新：
陳敏之同唐文龍有好多場親熱戲。
無綫50周年台慶重頭劇《溏心風暴3》入面幾條感情線，相信最有話題一定是唐文龍 (Michael) 與陳敏之的一段不倫戀。敏之所飾演的黃以愛，與Michael所飾演的人夫Nic由昨晚那集開始正式搭上並發生肉體關係，更激戰連場，由床上玩到去浴室鴛鴦戲水，場面相當火辣，尺度非常大膽，睇到觀眾同網民都好投入，邊睇邊鬧爆兩人。而今晚兩人甚至由香港偷情偷到去上海，借公幹為名攞正牌「依泣」，仲公然在酒店泳池嬉水親熱，完全當飾演Nic老婆的胡琳死嘅，真係好過份！
陳敏之喺唐文龍屋企攬住佢，完全唔理人哋個老婆都喺度。
Michael今日接受電台訪問時談到同敏之的激情親熱戲，表示：「最初自己都唔敢睇，敏之老公都冇眼睇，我話要擺和頭酒。咁大家都係工作，其實好多鏡頭都係靠借位，錫就冇借。嗰場浴室戲其實凍到我哋兩個死，因為沖涼淋水拍咗幾個鐘，轉燈轉位時我地最多都只係加件浴袍，真係沖到巢曬皮。同一日我哋仲有一場游水戲，拍到我哋冇哂熱力。」
就係呢場沖涼戲凍到佢兩個死。
至於敏之今日出席活動時就表示：「尋晚我老公冇睇呀，我想老公佢避一避啦，始終係老公，我又唔會迫佢睇。我同媽咪一齊睇，但咁樣仲尷尬，我直情用棉被去包住自己，點知媽咪睇完就話我實畀老爺奶奶鬧。佢哋好開通，唔會鬧我嘅。」她指今次是她從影以來意識最大膽的一次，亦係最痛心的一次演出，拍的時候都怕會因為太投入角色而陷入低潮，好彩回家見到寶貝仔仔就開心晒。」
兩個偷情偷到去上海。