【流星花園】小S飛撲攬新F4 問劇組:有姐弟接吻戲對吧!?

撰文:洪曉璇
出版:更新:

小S徐熙娣一向相當大情大性,對住男星飛擒大咬實在係家常便飯,佢仲特別鍾情小鮮肉,無幾耐之前先對無人不識嘅陳偉霆上下其手。最近內地翻拍經典偶像劇《流星花園》,小S接家姐大S棒加入劇組,不過就唔係演杉菜,係演另一個道明寺身邊嘅女人 –– 家姐道明莊。劇組呢日上載小S第一日入劇組時嘅花絮片,小S一見到新F4即時飛撲送上愛的抱抱,嚇窒幾位小鮮肉。

小S一到現場見到新F4,即刻逐個攬攬先,姐姐錫錫。(影片截圖)

其實小S一知道會翻拍《流星花園》,已經舉手話自己要參演,當時網友笑言以佢年紀可能係飾演道明寺媽媽道明楓。佢第一日入劇組就話,平時做慣焦點嘅佢,人生中第一次做女配角:「姐姐演過杉菜,當時我就覺得這個角色應該是屬於我的。現在總算跟《流星花園》扯上關係了,也不是演杉菜。」對於網友質疑佢會演媽媽定姐姐,小S搞笑地怒吼:「媽你個X啦!姊姊已經是極限了,OK?」

大情大性兼極有自信就係小S標誌,被網友笑佢可以做道明寺媽媽,激動啲都好合情合理。(影片截圖)

劇組喺小S出現前問F4,覺得小S會比較喜歡邊一位?飾演道明寺嘅王鶴棣馬上話:「肯定是我啊,畢竟是親弟弟啊。」等到小S出現,除咗逐個抱抱之外,仲問劇組:「我們有姊弟接吻的戲嗎?」工作人員都相當配合話有,嚇窒一眾小鮮肉。劇中獨立堅強嘅道明莊充滿貴婦FEEL,係道明寺最親近嘅家人,對一向性格外放大情大性嘅小S來說,呢個反差相信好值得期待。

第一次見面就要求加上亂倫FEEL姐弟接吻戲,小S果然KEEP住真我本色。(影片截圖)
+5