萬綺雯校服look零違和感散發少女味　網民大讚靚到好似時光倒流

呢行好多女藝人都係逆齡生長的表表者，個個都好似食了防腐劑一樣唔識老，而萬綺雯 (蚊蚊) 就是其中一位喇。今年已經47歲的蚊蚊除了身材keep到同以前拍《我和殭屍有個約會》系列時一樣咁fit，對長腿依然是咁無敵之外，她的樣子亦無咩點變過，完全睇唔到歲月有在她身上或臉上留下過任何痕跡。

蚊蚊今日就於她的微博上載了幾張靚相，相中的她穿起水手裝校服，紮住孖辮載埋格仔蝴蝶結頭箍，真係成個學生妹咁㗎。雖然未至於是十幾歲的少女feel咁誇張，但蚊蚊呢個look都散發出陣陣的少女氣息。她還與其他老友合照，當中包括前亞姐兼她的好閨蜜繆非臨，還有繆非臨現正就讀小學的囡囡，而蚊蚊站在繆非臨囡囡身旁，似十足一個大姐姐咁，點睇都唔似係一個阿姨嚟。網民大讚蚊蚊靚女之餘仲話好似時光倒流咗添呀。