【萬千星輝】 視帝王浩信05年歌手出道　被劉松仁怒摑13巴最經典

今晚《萬千星輝頒獎禮》最好睇一定係究竟視帝花落誰家，最後由人稱Signal Wong嘅王浩信憑《踩過界》盲俠一角奪得視帝，是他繼《星和無綫電視大獎2017》後再下一城。去年他都有份參演《不懂撒嬌的女人》，劇中飾演Saving嘅佢對住唐詩詠癡心一片，睇到唔少觀眾眼濕濕。而今次亦係王浩信第三次提名在頒獎禮中入圍《最佳男主角》，因為在前年頒獎禮中，他以《EU超時任務》以渠頭一角深受觀眾喜愛，可惜最後還是敵不過憑《城寨英雄》拳佬獲獎的陳展鵬。

2005年以歌手身分出道嘅Signal wong，要數到最紅嘅歌一定係佢同方皓玟合唱嘅《拖字訣》，當年真係唱K必點之一。可惜當時紅歌唔紅人，佢拎幾座樂壇新人獎後一直浮浮沉沉，07年更再無推出新歌。之後就轉戰TVB，2012年，王浩信係劇集《名媛望族》中被劉松仁怒摑13巴掌而引得觀眾注意，後來在劇集《法外風雲》中，再被謝雪心掌摑23巴，被網民戲稱「兜巴信」。2015年，Vincent演技備受肯定，在劇集《樓奴》首度擔正做男一，仲首度被提名「最佳男主角」，成為TVB力捧新晉小生之一。呢個氣勢延燒到2016年，他在劇集《EU超時任務》中飾演好生鬼嘅圍村村長，最後同朱千雪嘅愛情故事睇到唔少觀眾爆喊，當時更被網友力捧為去年視帝。

人紅就是非多，王浩信今次在《踩過界》中以盲俠一角再度爆紅，隨即引來不少新聞。當中一定以與老婆陳自瑤(Yoyo)的6年婚姻亮出紅燈，有傳因為Yoyo無法忍受老公太多女伴，傳言滿天飛。最後Vincent出席活動不得不為此澄清，「我同太太一啲事都無，放心」破解謠言。