【連坐法？】傳被林心如台獨風波牽連 霍建華《如懿傳》播出無期
撰文：洪曉璇
出版：更新：
霍建華同周迅主演嘅長篇劇集《如懿傳》，被觀眾封為新一年最受期待宮廷劇，網友更力挺有望超越《甄嬛傳》，無數觀眾抱以極高期待，不過直至今日依舊播出無期，除咗先前傳出90集篇幅過長需要重新剪輯，更嚴重嘅係因為林心如新劇涉台獨風波，有指身為老公嘅霍建華被牽連，要睇《如懿傳》可能真係遙遙無期，令網友相當失望。
霍建華同周迅主演嘅《如懿傳》，自開拍起已經備受關注。(網上圖片)
去年11月霍建華嘅造型照一出，馬上被網友封為史上最帥乾隆。(微博圖片)
《如懿傳》耗資3億人民幣製作費，更加係周迅繼《紅高粱》後相隔4年再拍攝嘅劇集，加上霍建華被封為史上最帥乾隆，陣容之強大令人相當期待。原先定檔於17年12月20日首播，後來傳出送審未能通過，之後三度申請中國廣電總局審查均被駁回，早前首波預告中寫上「2018年度巨獻」，不過至今仍未有消息，劇集官方微博喺12月22日後亦再無更新。
《如懿傳》官方微博12月22號後，已經再無更新，網友紛紛留言詢問到底幾時先會播出。(微博圖片)
霍建華林心如育有一女，私生活較為低調，但不時被唔同傳聞攻擊。(資料圖片)
有傳《如懿傳》除咗因為宮廷鬥爭戲篇幅太多，亦因為霍建華太太林心如再度膠着。林心如製作兼主演嘅台劇《我的男孩》，因為領取台灣文化部2千萬新台幣補助，被人檢舉為「台獨劇」，遭廣州廣電局全面下架。雖然林心如一方馬上發聲明強調「不支持台獨」，但《我的男孩》至今仍未於內地重新上架。有台灣媒體致電霍建華工作室，以及林心如經理人，佢地一聽到有關《如懿傳》同埋涉及台獨問題就表示唔方便回應匆匆掛線。
忽然被舉報新作涉及台獨，依家更有傳牽連老公，林心如應該相當苦惱。(網上圖片)