【渣打馬拉松】徐榮通宵開工直接跑半馬 胡諾言再戰全馬志在參與
撰文：洪曉璇 林迅景
出版：更新：
每年渣馬都係運動界盛事，數以萬計熱愛跑步嘅人都會不辭勞苦，凌晨就到起點做熱身準備參賽。兩位爸爸級藝人徐榮同胡諾言，今年分別參加半馬以及全馬賽事，由於平時都有Keep住跑步所以都信心十足，不過徐榮開完廠無瞓過直接到場參賽，完成賽事後接受《香港01》訪問時就話：「真係唔夠瞓好辛苦。」
呢兩位爸爸級藝人徐榮及胡諾言，一向都有跑步訓練，參加馬拉松一樣信心十足。(梁碧玲攝)
【渣打馬拉松．多圖】蔡思貝半馬勁快跑完：比目標時間快咗2分鐘【渣打馬拉松】余德丞相隔4年再挑戰10K賽：如果半馬就太辛苦
徐榮賽前預計自己完成時間大約係2小時，最終以1小時59分剛好達標，接受訪問時就話：「狀態一般剛拍完戲收廠，無瞓覺就過嚟，真係唔夠瞓好辛苦。自己真係未跑過，邊啲位要停，落斜係要放慢少少都唔知，好在有朋友傍住指點。西隧嗰段最甘，足足兩三公里，下年應該會挑戰全馬，睇下工作情況啦，如果開緊劇唔夠時間訓練就報返半馬，但自己就希望試下跑全馬。」
徐榮起跑前同蔡思貝一齊做熱身，兩個都係參加半馬，仲齊齊跑出目標成績。(梁碧玲攝)
而第二年參加全馬比賽嘅胡諾言，全副裝備早早到場熱身，佢就好過徐榮少少，之前一晚唔使開工，訪問時就話：「正常之前嗰晚要早啲瞓，自己十點幾瞓但瞓唔到，因為個仔又喊下個女又嘈下，不過狀態都好好嘅。預計時間4小時內，自己唔係職業運動員，都係鍾意跑步想參與下，總算係香港一大盛事呀嘛。最近忙緊拍新年節目同埋《包青天》，準備馬拉松都唔可能係最近嘅事，訓練咗一年時間，可能一星期跑一至兩次8至10公里，臨近幾個月就跑長啲大約30公里。不過近兩個月真係忙啲少咗練習，盡力啦。」
全馬足足42公里，胡諾言個個星期有跑開步，對佢嚟講4小時完成賽事應該係信心十足。(梁碧玲攝)