森美發現絕世好橋慳利是：唔會去陳豪屋企拜年

森美結咗婚十七年，每年新年派利是都大出血，派咗十幾年利是，佢今日出席活動時，就笑言話年年新年要避年:「其實話就話避年，講下笑姐啫，事實上全年都好忙，係得新年得閒啲，所以每逢新年都一家人去旅行輕鬆下。」

森美出名計仔多，派咗咁多年利是，佢發現一條絕世慳利是錢嘅好橋:「下年唔使避年喇，因為我有兩個小朋友，只要我搵到啲無仔女或者得一個仔女嘅家庭拜年，咁就有賺喇!」基於呢個原則之下，連老死陳豪都無面俾:「一定唔會去陳豪度拜年架喇，因為佢有好多小朋友，各位用我呢條橋慳錢嘅朋友記住唔好去陳豪屋企拜年。」