【咁唔小心呀】古巨基自爆入錯女廁：我呆了一秒才反應過來
撰文：洪曉璇
出版：更新：
近排古巨基動作多多，既要為宣傳新歌要去唔同節目做訪問，又要快閃去銅鑼灣Busking，仲要幫老友周慧敏擔任個唱總監，晚晚坐喺控制台指揮大局，第三場仲俾人捉上台合唱，聽到都覺得佢好忙呀。一連4場終於圓滿結束，基仔都可以鬆一口氣，點知放鬆過頭居然鬧出笑話，仲俾人逼佢影低瘀事添。
古巨基最近真係忙到一個點，眼袋都大咗好多呀。（古巨基Facebook）
連日來基仔穿梭周慧敏個唱唔同崗位，仲拍片同大家介紹紅館後台，揭開神秘面紗，就連歌手慶功宴食啲乜都可以一覽無遺，基仔趁古太不在場瘋狂偷食，由雞脾到Pizza一一掃晒落肚，實行食咗先講，估唔到慶功宴後先出事。話說基仔上載一張喺洗手間門外嘅相，唔係打卡打到去廁所，見佢頭耷耷無眼睇，原來基仔居然入錯廁所﹗
其實小編都好好奇，夜媽媽入錯廁所，係咪仲要set腳架影低佢呢？（古巨基微博）
基仔留言話：「凌晨兩點45分慶功宴尾聲，人有三急去個廁所。進門後隨便入了一個廁格方便，一邊解決一邊聽到有人入來進了另一廁格。如廁後洗完手便推門離開，開門後竟看見對面廁所門出來了一名男士，我呆了一秒才反應過來，回頭看到門上的人形公仔是著裙的！吖～～ 你地話到底係我太眼瞓睇錯入錯女廁定係佢個人形公仔條裙太窄呢？」網友瘋狂俾哈哈笑emoji，仲留言問嗰位男士到底咩反應，同埋張相到底邊個揸機，基仔無奈回應叫大家唔好提：「恥笑我嘅好同事們逼我影架。」
懂得自嘲同埋與粉絲互動嘅藝人真係唔多，古巨基咁有觀眾緣係有原因嘅。（古巨基Facebook）