余迪偉開show玩獨腳戲　半裸爆肌到底堅定流？

一向以口才取勝的余迪偉，四月將會大搞獨腳戲《一支弓》，而曝光的宣傳海報，驚見他有六嚿腹肌。余迪偉突然大隻，都會有人問手瓜起𦟌與結實肌肉係咪真，他就保持神秘地說：「到時你睇咗咪知囉！」，然後再講到今次影海報相真係好高要求：「今次真係赤裸入studio，最緊張當然是影出來的效果要靚，要有萬人敬仰的氣勢，事前都有好多準備功夫㗎。」

據知今次余迪偉做獨腳戲，大講自己一生。講嘢一直出位的他，透露會講埋Sex，貌似真係好爆。他說：「今次個騷會講自己成長過程，如何由小朋友變到今時今日百毒不侵，海報先給大家一個意想不到的驚喜，是另一面的余廸偉。大家睇開那個一矢中的、串咀余迪偉，今次仍然會有，不過整個故事其實是想感動大家，會由我細個講起，所以英文叫Salute to a Little Boy。內容包括我家人、我去外國留學、回流返港的文化衝擊等等。我的經歷同好多8、90年代香港人一樣，事實上香港一直都變緊，大家不要怕改變，change is good！」