王君馨婚後好甜蜜 鐘意俾老公攬住洗碗
撰文：冼燕珊
出版：更新：
王君馨今日出席TVB劇集《性在有情》宣傳活動，嚟緊係君馨婚後第一個情人節，唔知佢同老公Daniel點慶祝呢？「我哋都鐘意煮嘢食，又唔想出街同人迫，所以打算留喺屋企兩個人煮下嘢食。」問到Grace多唔多下廚，佢就話唔多，同埋自己唔鐘意洗碗，除非呢個情況:「如果我攬住佢，或者佢攬住我，一齊傾吓計，互相陪住大家，咁就好樂意洗碗喇。」真係好鬼Sweet呀！
君馨話自己唔多鐘意洗碗，但俾老公攬住，一齊傾吓計就唔同講法。（網上圖片）
君馨今日出席劇集《性在有情》宣傳活動。（江智騫攝）
唔講唔知，原來君馨同老公拍拖12年以來，上年先第一次一齊過情人節，佢話有次老公帶咗兩個大喼嚟香港，仲諗住佢男人老狗，做咩帶咁多衫返嚟，原來其中一個喼裝咗一隻巨型毛公仔，令君馨非常驚喜。講到維持婚姻之道，君馨就話：「會去下旅行，過啲二人世界，問下對方嘅感受，了解吓自己仲可以點樣做得好啲，而唔係結完婚就咩都唔理，大安旨意覺得咁樣就可以一生一世。」