古巨基玩化妝App 同林峯糖妹撞樣
撰文：冼燕珊
出版：更新：
古Sir古巨基喺Instagram上載咗一組相，係佢玩化妝App嘅相嚟，佢寫道：「前幾日玩咗個App化女妝，朋友們話我最似糖妹、慧嫻、仲有林峯。」古Sir仲好俾心機咁做埋對比圖，相中嘅佢，經個App幫佢加長咗啲眼睫毛，同埋掃上啲胭脂，柔化臉型，望落臉圓圓，驟眼睇真係會認錯咗做糖妹。
呢個係糖妹定古巨基?(IG圖片)
你又覺得古Sir同林峯似唔似樣?
而糖妹本身就同陳慧嫻似樣，所以古Sir似糖妹等於似陳慧嫻，係一啲都唔出奇，但另一張相竟然係同林峯撞樣，相似度都有85%。唔少粉絲留言，有其他意見，有啲話佢似馬國明、梁朝偉，有啲仲話似小儀添！個Range會唔會太大?唔知你又覺得古Sir仲似邊個呢？
仲有網民話似梁朝偉。(資料圖片)
馬明一講靚女就口窒窒。（陳順禎攝）
連小儀都有人話似，你哋覺得呢？（IG圖片)