楊洛婷兩公婆互相照應　湊B唔請工人都好輕鬆

剛生完四個月左右的楊洛婷（Rabeea），並沒有因湊女而停工，佢今日現身鐘錶活動，擔任主持，Rabeea接受香港01訪問表示，雖然佢係新手媽媽，但湊B無難度：「我哋都係自己湊，無請工人，如果我要工作，老公阿Tim就會睇住佢，如果佢返工就我自己湊，如果兩個都要做嘢先交俾奶奶湊，其實依家囡囡出世4個月，都湊得好輕鬆。」

好多新手父母都因為照顧新生BB而焦頭爛額，但Rabeea就湊得得心應手，除咗扮靚靚出席活動，佢仲可以一邊湊小朋友一邊抽時間做運動：「等BB瞓咗之後就會抽時間做運動，天氣好嘅時候就帶佢出去散吓步，所以其實湊B真係無想像中咁困身。」

Rabeea因為懷孕而重咗30-40磅，生完之後都仲有30磅，佢除咗做運動，都有其他輔助收身方法：「我有去美容院做機，1個星期3次，效果真係好好，全身瘦咗好多吋，亦減咗好多磅，另外我仲有做古法紮肚，呢個唔係只係為咗減肥，亦係有保健作用，因為生完BB之後，啲內臟移位，靠紮肚嚟令到腹直肌復元。」Rabeea所講嘅古法紮肚，有唔少女明星生完之後都有做，包括徐子淇、張名雅、陳爽等。Rabeea強調佢唔係一個追求骨感嘅女仔，所以會選擇健康嘅方式減肥。