【鄭子誠．專訪二】內地劇香港難突圍：觀眾對大陸明星有少少疏離
撰文：黃梓恒
出版：更新：
上回講到鄭子誠在做奸這方面的學習對象和經歷，今次回歸到他入行的時候，他對於演戲，其實在初初並沒有希冀，心目中最重要的是電台工作，用聲音去娛樂大家。當時一入TVB做主持，拍《城市追擊》，沒有受過任何戲劇訓練，誤打誤撞入了《真情》劇組，當時根本沒有想過當一個演員，只是抱著不妨一試的心態，他說：「學到好多嘢，當然中間經歷過好多艱難嘅地方，自己畢竟唔係做戲出身，好多謝得到咗奸人呢條路，可以藉住呢條路繼續行落去。」
無學過拍戲都做得咁好，好有天份。（林迅景攝）
電台平衡他的人生
在演藝生涯最艱辛最低谷的時候，幸好有電台工作拉他一把，而且電台的工作也有助他平衡在TVB的拍攝生活：「可以平衡返我個人格分裂，因為劇入面我成日都做奸角，但現實生活我唔係咁嘅人，如果做完戲就返屋企好難抽離，但當你做完戲去做電台節目，你焗住要做返音樂情人，可以令我平衡返，唔係就好辛苦。」由奸人轉去做音樂情人，隨時會精神分裂，不過多年來子誠已經將這個狀態平伏，在TVB要姦淫擄掠，大聲大叫；返到電台做回一個平靜的人，的確不容易。
講起鄭子誠，你會諗起奸人先，定音樂情人？（林迅景攝）
香港電視界仍然有優勢
最後，他也寄語香港電視界，其實大陸劇在香港始終有個不穩定因素，無論演員和文化都未必適合每個香港觀眾，但子誠覺得香港可以用自己的優勢繼續發展落去，他說：「香港電視業嘅優勢係演員嘅親切感，畢竟係喺香港長大，對於某啲香港演員嗰種親切感，佢喺螢幕出現會特別有一種close嘅感覺。內地有啲好大知名度嘅演員，點解落嚟香港唔會大收呢，其中一樣就係一般觀眾對佢有少少疏離，雖然套劇好，但演員嘅親切感係會爭咗少少，所以我哋仍然可以喺呢方面拍好個劇本。有香港特色嘅劇集係有著數，如果你要拍古裝，資訊上面唔夠內地龐大，亦唔夠地大脈搏，但香港仍然有警匪片，對內地同整個東南亞都仲有吸引力，因為香港好擅長拍呢類。」
對於電視同電台，子誠諗都唔使諗就揀電台。（林迅景攝）