【無間道】羅仲謙內地拍劇要吃虧：現階段係人揀我
撰文：張嘉敏
出版：更新：
羅仲謙近年主力於內地拍戲，努力賺人仔，他出席劇集《無間道》宣傳活動時，被問到享受在無綫拍劇多些，抑或是喜歡在內地拍戲多些，他說：「老實講，喺TVB拍戲係開心啲嘅，始終大家同聲同氣，成班人邊玩邊做好融洽。喺大陸拍戲，飲食方面仲未適應到，自己飲食比較健康，所以對呢方面要求會高啲。其實大陸對演員嘅待遇好好，衣食住行都會好照顧。」
羅仲謙話拍戲受傷梗有嘅。（梁碧玲攝）
他強調自己不會揀要在邊度發展，只要有機會都會去：「現階段嘅我機會太少，係人揀我，唔係我揀人，呢行競爭好劇烈，除咗香港、內地、台灣，仲有韓國、泰國等地嘅演員，自己要更加努力，更加吃得虧先得。（喺大陸兩年搵嘅錢等如喺TVB 10年賺嘅？）傳係咁傳，但當然無咁誇張啦。咁喺大陸薪酬係優嘅，幾多就唔講喇。」
謙謙話要唔怕蝕底先可以同人競爭。（梁碧玲攝）
提到他拍電影《女兒國》時受傷兼拍到體力不支，謙謙說：「唔可以話辛苦，咩工作都辛苦，呢套戲對演員嚟講係難度高嘅，受傷係真，不過只係皮外傷，拍戲實有嘅。演沙僧身心都好大負擔，身體要負重20、30磅戲服，化咗妝又唔可以食嘢飲水同去廁所，搞到我有少少強迫症，會喺埋位之前食晒嘢去晒廁所。8-10個鐘食唔到嘢好普通，我又唔好意思麻煩人幫我補妝，會死忍。如果著住戲服去廁所要個半鐘，每日拍8個鐘，去一去廁所就無咗個半鐘，所以我唔會去。」
謙謙話拍完《三打白骨精》同《女兒國》後，以前啲辛苦都係碎料。（梁碧玲攝）
謙謙同郭富城一樣覺得拍《西遊記之孫悟空三打白骨精》以及同系列的《女兒國》是從影以來最辛苦的，拍完這兩部戲之後，謙謙覺得以前所拍的古裝片的辛苦都不算甚麼。他說：「呢兩套戲難度好高，啲人話拍古裝好熱，啲衫好重嗰啲全部碎料嚟。依家會覺得拍戲等係好幸福嘅事，可以畀時間整理自己嘅心理狀態，又可以同人吹下水，食下嘢。同埋會覺得演見到樣嘅角色係幾咁幸福嘅。」