【情人節】林欣彤唔唱冧歌學做小三：朋友覺得我份人好鍾意忍
撰文：鄺鈺瑩
出版：更新：
林欣彤為新歌MV做小三。
林欣彤（Mag）去年重新演繹Dear Jane的《哪裏只得我共你》大獲好評，其處女執導MV亦在YouTube獲得逾63萬點擊。相隔不足兩個月，Mag又有新作面世，較啱時間於情人節面世，以為會係冧豬情歌，結果竟然是孽戀。
見到男友向正印求婚，即時崩潰。
新歌《忍》MV找來好姊妹兼戰友陳慧敏友情演出，飾演小三的Mag本身打算安慰好友陳慧敏失戀，誰不知撞正男友向其正印求婚，如同拍戲般的情節，Mag即時拎手袋走人，並在中環街頭拔足狂跑，雖然拍攝當晚得十度，但Mag打扮十分單薄，再加上於大街上崩潰喪喊，真係我見猶憐！
喊得真係好慘吓。
事後Mag笑言整個拍攝過程最辛苦並非捱眼瞓及捱凍，而係喊：「我份人平時都唔係咁易喊，我好驚拍嗰陣喊唔出阻大家收工，所以都幾大壓力。我早一、兩日開始已經儲定啲唔開心嘢，希望逼到自己喊。」她又感激好友陳慧敏傾力演出：「真係好多謝佢，因為佢係特登由澳門坐船過嚟香港幫我拍呢個MV，一拍就拍咗７、８個鐘，搞到佢成朝頭早７點先收工，真係相當唔好意思。」
雖然無份執導，但Mag同導演以及同事開咗好多次會。
對於今次《忍》MV內容及方向均一手策劃，Mag表示：「其實點解會有呢隻歌《忍》呢？係因為我有個朋友覺得我份人乜都好鍾意忍，大家傾傾吓就覺得可以試做呢隻歌。同埋我覺得情人節係一個好特別嘅節日，雖然有好多情侶會開心慶祝，但其實好多單身、或者感情生活唔係咁如意嘅人，係好想skip咗呢個節日，所以好想送呢隻歌畀佢哋，話畀佢哋知，you are not alone。」