型佬任達華Keep Fit全靠正能量同做運動：酒店房一定要有跑步機
撰文：張嘉敏
出版：更新：
下個月就63歲生日的任達華（華哥）一直都keep得好好，就好似食咗防腐劑咁，無論個樣同身形都fight低好多後生仔，man到爆，仍然可以在賀歲片《我的情敵女婿》裏與衛詩雅做一對。到底華哥有甚麼秘技可以留住青春，多年來都keep到個狀態咁好呢？他接受《香港01》訪問時表示：「最緊要保持心境開朗，同自己講無論咩問題都可以解決嘅。」
任達華型佬形象深入民心。(梁碧玲攝)
而華哥在飲食方面都好節制，實行三戒的健康飲食習慣：「戒糖、戒鹽、戒油，已經戒咗十幾年，就算唔戒絕都盡量食少啲，清淡都有清淡嘅好味，我哋小朋友時食嘢都好清㗎啦，咪一樣會覺得啲嘢好味，囡囡同我一樣都食得咁健康。」
華哥話最緊要保持心境開朗，劉嘉玲都深有體會吧。(梁碧玲攝)
華哥話當然仲要配合運動，「我會游水、跑步、舉重、跳繩等，無規定幾耐做一次，做到就做，爭取時間做。我拍戲時都會帶埋條繩去跳繩。如果出trip拍戲超過3星期，我會要求間酒店房一定要有部跑步機。」
華哥出埠拍戲超過3星期一定會要求酒店房有跑步機。（梁碧玲攝)