【波士早晨】簡淑兒第一部劇 演技連自己都驚：睇返都尷尬
撰文：黃梓恒
出版：更新：
《波士早晨》話咁快就去到結局篇，由簡淑兒(Jessica)飾演的小秘書Hanna，自從得到太子爺Travis（張致恆飾）的歡心後，在公司開始站穩陣腳，感情線都慢慢浮面。Jessica表示自己都有睇返部劇，接受《香港01》訪問時，被問到睇返當年嘅自己有甚麼感覺，她即時十分大反應地說：「嘩！真係倒抽一口涼氣，首先講個外表先，我發現嗰陣我係勁肥，係無下巴㗎！兩邊面勁包，手手腳腳都係包。第二就係自己啲戲喇，好新！自己睇返都會尷尬，而家睇返就會諗點解嗰陣唔咁做，其實嗰陣拍完都已經有諗過。」無歷練又點會進步呢？汲取經驗就可以慢慢邁向成功。
Jessica睇自己竟然要倒抽一口涼氣。（陳順禎攝）
翻查資料，原來這套劇是Jessica第一部拍攝的劇集，但睇落又唔似，演技尚算自然，她表示：「呢套係我第一次拍戲，仲早過愛回家，所以嗰陣監製嚟搵我真係好開心，好似中獎咁。嗰陣我做緊主持渣嘛，突然間監製就搵我，仲要係重要角色，監製嘅諗法就係想搵個全新嘅人去做呢個角色，因為每個演員都只有一次係拍第一部劇，佢就係想要呢種感覺，所以就好大膽咁搵咗我。」現在的Jessica愈來愈多演出機會，除了就快播出的《大帥哥》，還有拍攝中的《好日子》，希望佢幾年後睇返唔會再尷尬喇！
監製今次無搵錯人，Jessica好啱呢個角色。（陳順禎攝）