港姐出身黃碧蓮當主持3年 告別TVB兒童節目喊住講拜拜

撰文:陳栢宇
出版:更新:
黃碧蓮係最後一個離開《Think Big天地》嘅元祖級主持,上面嗰張係3年前,下面嗰張就最近嘅。(網上圖片)

當譚玉瑛離開兒童節目主持崗位,好多睇佢睇到大嘅觀眾都真係唔開心咗一排,而睇住兒童節目《Think Big天地》成長嘅小朋友,最近亦體驗到呢份離別帶來嘅傷痛,因為繼余德丞、林希靈同黃愷怡,最後一位有份開創節目的元祖級主持黃碧蓮(Linna)亦在早排正式從節目畢業。而她在有份演出的最後一集中就顯得非常不捨,到臨尾要講拜拜時,更忍唔住喊咗出嚟,隔咗個Mon都畀呢個氣氛感染到眼濕濕。

一班主持都向Linna送花,祝佢前程錦繡。(網上圖片)

Linna在網上便指自己好感恩可以加入《Think Big天地》這個大家庭:「3年前左右我自己一個人嚟咗香港,因為我喺香港冇家人,所以你哋就成為咗我家人。其實一開始一啲都唔易,環境唔熟,中文又唔好,真係從零開始。」她非常感謝一路以來遇過的人,包括每位小朋友、家長、老師,以及節目監製、導演等一班幕後:「好多謝大家咁包容、咁耐心對我。」她好開心可以在節目中為小朋友帶來歡樂,未來亦會繼續在J2的《安樂蝸》、《今期流行》,以及明珠台嘅《港生活.港享受》亮相。

各位唔捨得Linna嘅觀眾唔使太傷心,佢會繼續喺《安樂蝸》、《今期流行》同《港生活.港享受》呢3個節目度亮相,遲啲仲或者有機會拍劇添。(網上圖片)

其實Linna都好想拍劇,亦透露見過劇集監製,不過自知中文爭少少,她接受《香港01》訪問時便說:「我同經理人都有傾過呢個問題,佢建議我去補習,所以趁依家得閒少少都想搵啲本地大學課程讀。(搵個男朋友練廣東話仲快啦!)點解個個都係咁講?香香、李亞男幾位師姐都係咁講,話有個香港男朋友,廣東話會進步得好快,但係我覺得香港男仔好似有啲驚我。(點解?)可能我拍兒童節目時太癲喇,成個小朋友咁,但喺明珠台又成個大人咁,大家都唔知邊個先係真正嘅我。」

加油呀!(網上圖片)

Linna離開《Think Big天地》時嘅情況:

+4

其實佢平時都Post唔少靚相:

+6