呂良偉除時返tvb拍劇 公開多謝鼎爺恩惠:無佢我唔會入行 

撰文:張嘉敏
出版:更新:
呂良偉到依家都好感激鼎爺。(梁碧玲攝)

呂良偉 (阿呂) 早前為品牌進行拍攝工作期間,重提41年前李家鼎 (鼎爺) 有恩於他的一段往事,話說當年阿呂剛在無綫訓練班畢業,TVB竟然不簽他做旗下藝人,鼎爺就嬲到去找高層理論,仲拍枱話:「你哋唔簽佢吖嘛,咁我簽佢做龍虎武師囉。」今晚阿呂出席活動時被問及這段往事,即承認確有其事,並謂:「鼎爺無拍枱,佢幫我爭取啫,佢係我哋武術班嘅班主任,係我師傅,我就做班代表。佢話我呢個徒弟代表班去考試,咁嘅人才都唔簽?咁佢簽我做武師囉,當時武師人工係$150一日,係藝員人工嘅一倍,藝員得$80一日,佢哋聽完鼎爺咁講咪即刻簽我囉。」

阿呂透露樂小姐有搵佢返TVB拍劇。(微博圖片)

雖然鼎爺曾表示唔敢叨阿呂光,不過阿呂卻衷心感激鼎爺對他的知遇之恩。阿呂說:「我成日都同人講呢件事㗎,無鼎爺佢幫我,我就入唔到呢行,我能夠入行完全都係因為佢。鼎爺真係有情有義,仲係一本百科全書,教識我好多嘢。」他當然都好想去捧鼎爺的私房菜場,但就未同鼎爺夾到時間:「打畀佢幾次都仲未夾到,佢又忙到飛起。」除了鼎爺,我在這行中也有很多人想多謝,例如麥當雄、李香琴等,他說:「我應該出本書嚟多謝大家,會回憶返好多往事點滴,等我籌備下先。」

阿呂又話當時在訓練班個個人都有機會演戲,由一些小角色慢慢做起,他有感現在演藝圈的機會比以前少了:「窄咗,環境都變咗,整個大市場轉移咗去中國大陸。我成日都有諗點先可以幫到更多想入行嘅年青人。」問到TVB現時是否已很難再請得郁他拍劇,阿呂說:「拍劇個劇本好緊要,一定要有好劇本,錢反而係其次,唔係咩都睇錢嘅,香港本地觀眾同我一齊成長,始終好有感情,如果TVB需要我而又有好劇本嘅話,我唔介意返去玩下。(有無人同你接洽過?)樂小姐 (樂易玲) 有同我講過,我依家仲度緊。」