Bob蕭正楠張振朗做《美女廚房》新主持　「會繼續賤賤格格」

TVB未來除咗有多不勝數嘅新劇等住播，仲有好多精彩嘅綜藝節目畀觀眾邊睇邊笑。今日TVB就喺香港國際影視展中宣布之後有一系列播出，包括有馬國明、黃智雯、胡鴻鈞嘅《降魔的 捉妖遊戲》、馬國明同黃心穎情侶檔嘅《深宮計之闖關遊戲》同古巨基做返以前各種工作崗位嘅《古巨基初心再體驗》。不過，大家最關心嘅應該都係林盛斌（Bob）、蕭正楠同張振朗主持嘅《美女廚房》第二輯，會唔會去得返第一輯嘅高度。

今日Bob同蕭正楠代表節目接受《香港01》訪問時就坦言為此有壓力，其中蕭正楠就咁講：「我呢方面零經驗，驚拖垮成個節目，同埋呢個節目都係咁多人嘅回憶，但監製畀好大信心我，話個節目形式同上一輯唔同，同埋阿Bob喺度我都好放心，希望可以為觀眾帶來歡樂，好難得有機會可以試下去令全場現場觀眾捧腹大笑。」

至於Bob就話雖然可以圓喺一廠做大騷呢個心願，但始終第一輯太經典：「完全明白網友話我阿Bob、蕭正楠同張振朗呢個組合有啲『特別』，同以前鄭中基、方力申同梁漢文畀有啲落差咁，但我都好多謝大家關注呢個節目，所有意見都會收到，亦都會借此慢慢改善個節目，都好想咁多位主持人可以建立到個默契。其實我好多謝好多傳媒朋友同網友嘅關注，今次對我嚟講係一個工作上好重要嘅里程，因為可以喺一廠主持一個系列嘅綜藝節目係我做主持人嘅夢想，但係另一方面亦係一個好大嘅挑戰，因為上一輯嘅主持實在做得太好，亦係好多觀眾心目中嘅經典同集體回憶，所以我完全明白同尊重消息傳出之後大家嘅反應同意見，各位網友們嘅留言，無論正面定負面，對我嚟講都係好重要嘅推動力，令我明白自己不足嘅地方，好好檢視自己點樣可以再做好d，進步同改善。」

有唔少人就擔心三位新主持，比起曾爆肚講「啲奶假嘅」嘅方力申、鄭中基同梁漢文唔夠賤格，Bob笑謂：「其實我哋三個都唔係咩好人！但其實以前個尺度同依家都會唔同，公司依家都未必想太踩界、太暴露，但互吋、碎咀都會繼續賤賤格格嘅。」

記者笑指蕭正楠已經夠哂賤，蕭正楠即爆笑：「多謝你喎！不過我都希望可以將自己生活中嘅頑皮放入節目度，好想同新拍檔擦出新火花，等我可以繼續分享多啲笑聲畀大家。」至於「粥粉麵飯」的人選，Bob就指未定，但比起美女如雲，他更想節目會有更多煮得之人：「上輯得蘇玉華嘅嘢放得落口咋！」至於有網友話說話太大聲，Bob就話：「之前有網友話過我做主持講嘢好大聲、好嘈、好浮誇，其實最近我主持《大玩特玩》真係有去好好控制自己聲量，亦嘗試唔好吓吓都咁誇張、咁癲，我發覺出嚟效果唔錯，身邊好多朋友都話睇得好開心，所以好多網友們嘅意見都係好有建設性，我真係好希望一步一步去努力改進，令觀眾同網友們對我改觀！」真係好正能量呀！