【世界難撈】古巨基為宣傳個唱出盡力 殺落巴士站挑戰發呆一分鐘
撰文：洪曉璇
出版：更新：
踏入3月尾春天已經來臨，唔太凍又未開始炎熱，天氣咁好真係想咩都唔做，食完午餐發下呆瞓晏覺，人生一大樂事呀！之前喺網上掀起熱烈討論嘅發呆比賽，下星期嚟到香港舉行，唔少藝人好似張繼聰、方力申都有拍片挑戰，呢日就輪到古巨基，佢仲走上街頭定格發呆，面對絡繹不絕嘅市民影相打卡，會唔會令佢挑戰失敗呢？
基仔走到街頭挑戰發呆一分鐘。（影片截圖）
無端端見到古巨基企定唔郁，緊係行埋去自拍打卡啦。（影片截圖）
喺屋企發呆有咩難，基仔就話：「應側田邀請做呢個發呆一分鐘，一係唔做，一係就好玩得意啲。」佢著上一件類似星戰白兵外套，走到一個巴士站，企喺自己紅館個唱海報前面，挑戰發呆一分鐘。途人一開始好奇係咪真人，然後陸續有人企埋去自拍，有位女士仲話唔知抓癢佢又會唔會笑。一分鐘過去，基仔終於郁得返，佢話：「原來一分鐘唔郁條腰好攰架」仲笑言「眼睛不能沒眼淚，個口不能沒口水。」
有途人可能懷疑呢個係真人定蠟像，想搔癢睇下基仔會唔會郁。（影片截圖）
古巨基銅鑼灣Busking唱兒歌medley 卡通版《勁歌金曲》面世啦！
睇下市民見到基仔幾開心幾肉緊。（影片截圖）
之後基仔再拎住50蚊搵人兌換散銀，親自搭巴士同乘客自拍相當親民，原來一切都係為咗宣傳演唱會優先訂票消息，呢招走入人群真係相當貼地呀，網上討論區有好多人po相話見到基仔，宣傳效果十足。其實基仔已經唔係第一次走上街頭宣傳，之前就試過忽然去到銅鑼灣Busking，吸引大批途人圍觀，睇嚟以後出街真係要落足眼力，基仔隨時喺左近呀。
基仔仲搵人兌換散銀上巴士去紅館。（影片截圖）
+2