As One跳舞齊MV又好睇　有啲懷念呢隊香港難得的女團

說也奇怪，香港啲女子組合近期好似全部失晒蹤，無晒消失嘅？定係其實有，不過無咩特別、吸引之處，連討論都可以慳返？咁樣講其實都幾sad，亦更加令人懷念已經解散咗嘅As One！

As One成員青春靚麗，歌曲風格、MV氣氛偏向韓風，更難能可貴嘅係做到香港好多女子組合做唔到嘅事，就係舞步畫一整齊，跳得相當好睇，而歌唱方面亦都唔差，所以與其聽As One嘅歌，不如「欣賞」佢哋MV，某程度嚟講都係一種享受。未欣賞過？介紹你睇睇《Catch Me Up》、《4EVER》、《Candy Ball》、《Hey Ya》。

可惜，2012年成立嘅As One經歷過數次成員變動更替，先有Oli、Elfa、Nata及Shin四位，後來Oli與Elfa因傷病離隊，換上Chloe和Kayan。至2017年中、上旬，隨著Nata同Shin離開，只剩低Chloe、Kayan二人嘅As One名存實亡，最終喺2017年12月解散，歷時5年。

Oli黃佳宜

As One成立前後6位成員中，最早離開嘅一位。據聞佢2013年因子宮生瘤嘅關係而暫時退出休養，並於次年一月正式回歸。不過，2014年8月再因身體健康、學業等原因正式退出。

Elfa邱念恩

人稱花花，當年一頭金髮最搶眼，加上身形窈窕卻又不失豐滿，因此頗得巴打們歡心。喺Oli退出後，As One以包括Elfa在內嘅三人組繼續活動，隨後先有Chloe和Kayan嘅加入。不過新人加入後兩個月，Elfa就因傷患為由退出。而家嘅花花髮色無以前咁金，亦多咗一啲可愛嘅baby fat，由以往嘅索女，搖身一變為可愛清純風格嘅女仔。

Shin吳思佳

中韓混血兒，隊長、第一主唱及主Rapper。由於As One單曲《Candy Ball》推出韓文版，As One成為首個喺韓國出道嘅女子組合。而Shin因為韓國血統、識啲韓文，獲南韓電視台邀請參與女團育成節目PRODUCE 101後，短暫退團，並喺節目中殺至廿二強才止步，但足以幫佢儲落唔少香港以外嘅粉絲，所以作為第4位離隊嘅Shin，選擇跳槽離開喺內地單飛出道，不無道理。

Nata陳苑澄

Nata只係藝名，離隊後嘅佢叫做Tania，據聞當初佢喺自己提出提前同太陽娛樂解約。相比起其他幾位As One嘅隊友，Tania睇落係變得最少嘅一位，而日前佢亦相約Chloe與Kayan二人聚餐。

Chloe蘇皓兒

模特兒出身，曾參演方力申《捨．得》MV，其後亦與男方打籃球而傳過緋聞，不過Chloe的緋聞對象很快就轉變為王宗堯，因為酷愛打籃球的她，被發現抆住王宗堯衫尾現身足球場，充當男方嘅攝影師，影低王宗堯球場上嘅英姿。Chloe現今工作量較少，傳聞因為同王宗堯嘅關係令佢被雪藏，而近日佢亦剪短頭髮，以新形象示人。

Kayan陳嘉茵

Kayan可說是As One當中，單飛成績最成功嘅一位，事關佢自發為周董的《告白氣球》跳COVER DANCE並上傳上網，成為一時熱話。其後又轉戰台灣，參加當地綜藝節目《希望之星》，憑紮實唱跳功力最終獲得總亞軍。不久前Kayan亦有現身《流行經典50年》展現唱、跳以及彈古箏的功架。