容易受傷的女人:周秀娜拍戲又整親 博到盡唔錫身

撰文:冼燕珊
出版:更新:

周秀娜拍戲成日整親,因為作為潮州女仔嘅佢,做嘢博到盡,一啲都唔錫身。娜姐目前喺泰國拍緊動作戲,佢喺IG Po咗幾張自己打到周身瘀嘅相,不過佢依然面帶笑容,似乎反而因為自己盡全力拍戲而受傷覺得滿足,仲話:「拍動作戲,瘀是常識吧!」

娜姐拍戲又受傷,拍動作戲搞到周身瘀(IG圖片)

作為一個靚女,咁唔錫身,只為「一係唔做,要做就盡力做到最好」,呢句座右銘似乎成日都可以喺娜姐身上見到。從娜姐入行由𡃁模做起,當日大膽喺鬧市馬路除剩三點式泳衣令佢聲名大噪,後轉攻電影界,陸續得到一些外國電影節肯定,先後獲洛杉磯電影節及釜山亞洲新媒體電影節頒發「最佳女演員」,今年仲憑《29+1》入圍香港金像獎最佳女主角。娜姐入行十數年走來不易,只因佢面對每個挑戰都係盡力而為。

周秀娜今年憑《29+1》入圍金像獎最佳女主角(IG圖片)