【金盆𠺘口】黃子華寧願吉位唔益黃牛　4月24公開發售每人限買4張

黃子華棟篤笑騷收山作《金盆𠺘口》今日信用卡優先訂飛，全城掀起撲起熱潮，有網民話打左幾百個電話都打唔通，真正係一票難求，唔通真係焗住要畀貴幾倍？

黃子華今日鬚都未剃就Facebook開Live澄清，事關原來佢嘅團隊喊晒口打畀佢，起初黃子華以為係啲飛唔賣得，但原來唔係喎，子華神語重深長解釋：「係因為一朝早電台阿、記者阿，各方面都搵佢哋，網站啲人賣黃牛話有內部既渠道，各位，嗰啲話有飛既黃牛，我到今日為止都係冇飛」子華神有有考慮報警，但可惜未任何證據去舉報，黃子華仲向政府提出：「黃牛最大嘅問題，係根據現有法例唔係exactly係犯法，所以先每一個演唱會都出現咁多問題，我正式向政府有關部門提出係時候要正視呢個問題，可能因為睇演唱會好似奢侈品咁，所以咪唔理你，當你炒賣iPhone咁。」

但最令黃子華嬲嘅，係網民對佢嘅誤解，佢仲越說越激動：「我之前都有睇過網上評論，講到都有啲激動，各位我冇咁嘅本事，我比任何人都覺得嬲！因為每日臨訓之前諗返嗰句野點講呢、有句野點講仲諗左成個月，大家都好辛苦，但就畀啲唔需要努力嘅人賣貴7倍」

「我一路都係接受世界係唔完美，但係咁係太過不完美，太過離譜！我呼籲政府幫吓手，觀眾唔買唔緊要嘅，我做騷見到有一大段最前嘅位空晒佢，咁如果我見到好多場都係咁，即係好多人係冇買黃牛，咁我會補返畀佢地囉，不過可能要出年。」

黃子華預告 4月24號將會正式喺城市售票網賣飛，總共場有二十幾場，每人限買4張，佢解釋：「原本預2場休息，仲有1場預打風賠畀大家，依家推晒出嚟！應該係有唔少嘅飛，我上次做11場紅館，今次係多過double！」黃子華希望儘量滿足觀眾，畢竟總會有有人買唔到飛，希望大家體諒，佢仲搞笑話前2日見到吳君如，吳君如笑佢：「睇你奀挑鬼命邊做到2幾場！」，為咗滿足一眾粉絲，子華神決定頂硬上踩足廿幾場！