【冒險王衛斯理】張秀文做人質做足半季 想挑戰宣萱王者地位？
撰文：陳栢宇
出版：更新：
無綫新劇《冒險王衛斯理》裡面索女如雲，不但有胡然、文凱玲、甄琪同邱意濃，仲有我哋好熟識嘅張秀文，而張秀文喺今日記者會裡面亦非常性感，以白色低胸裝亮相，撼贏其他女星。至於喺劇集裡面會唔會有性感演出？張秀文就話冇乜：「呢啲劇情冇發生喺我身上，但係我成日畀人捉走！」咦？講起做人質呢樣嘢，宣萱永遠都係喺領導地位，問會唔會有機會追過佢紀錄？佢就咁答嘅：「第一季十二集裡面有六集係畀家棟哥同華哥捉走咗，其實裡面都有一幕係少少性感嘅，因為係講家棟哥虐待我，啲衫會爛哂。」
成季劇集有一半時間做人質，其實都真係一個創舉。（陳順禎攝）
提到倪匡嘅衛斯理小說系列，張秀文就話自己細細個已經係粉絲：「仲要係第一套睇嘅小說，當時鄰居搬屋送咗本畀我，之後就喺公共圖書館係咁借其他嚟睇，睇咗成個系列嘅八、九成，所以依家可以參演一角好開心。」都真係估唔到張秀文係有文學少女底喎，唔知佢仲有冇睇書嘅習慣呢？佢就咁答嘅：「讀書時會比較多，成日去圖書館打躉，依家都會睇日本、香港嘅偵探小說。」
估唔到張秀文係衛斯理小說系列嘅真‧Fans，仲煲咗成個系列嘅八、九成。（陳順禎攝）
其他張秀文、胡然、文凱玲、甄琪同邱意濃嘅靚女相：
+20