【果欄中的江湖大嫂】Johnny仔原來勁大隻 仲喺少林寺學過功夫
撰文：林通賢
出版：更新：
《果欄中的江湖大嫂》有追看的電視迷不難發現，每次奸角Kent哥（李天翔飾）出場，就知有壞事發生，而Kent哥身為大佬身邊必定有兩位打手，一位是衞志豪飾演的高B，至少被馮盈盈連摑十巴，大家應該有印像，但除了高B外，李天翔隔離還有一位高高大大，Skin head造型的惡漢，他是２７歲的譚坤倫Alan，原來是４０吋胸肌、８嚿腹肌的猛男。
無論胸肌、腹肌、背肌，譚坤倫都下過苦功，肌肉從來都唔呃人，有冇苦練過一睇就知。
其實譚坤倫本身有武術底，2011年參加無綫《功夫新星》入行，亦在嵩山少林寺中心武術學校受訓，學中國功夫講求靈活性，所以譚坤倫入行時，不是爆肌，更有少少排骨仔，不過自從張家輝在《激戰》後，唔知點解所有男星都要操大隻，譚坤倫亦不例外，看他ig的紀錄，應該在３年前開始爆肌，上年已經開始有成績，最可惜在《果》劇無機會除衫，如果佢被派到做果欄嗰邊，跟黃浩然咁就好喇，至少都會見到佢隻麒麟臂。
譚坤倫未瘋狂做gym前，未至於排骨仔，但梗係而家型好多啦。
不過大隻係有市，譚坤倫除了《果》劇外，事業亦開始上升軌，最近在新劇《包青天再起風雲》入面飾演開封七子之一，不過又係包到實，希望監製醒目，俾場爆衫戲這位年青人，不過古裝真係好少機會除衫，除非出浴戲啫......
+8