【東張西望】為五迷出頭 利穎怡被職員話多事:點解打尖嘅拎籌先

撰文:陳栢宇
出版:更新:

對於好多人嚟講,尋日嘅朝頭早只係一個好平常嘅朝早,但對於一班鍾意五月天嘅粉絲而言,卻係一個好重要嘅日子,因為五月天香港騷嘅門券喺尋日嘅朝早公開發售。不過,因為黃牛黨肆虐就令到呢個原本值得興奮期待嘅日子,變得怨聲載道。喺尋日播出嘅無綫節目《東張西望》裡面就呈現咗尖沙咀通利琴行外嘅情況畀觀眾睇,其中外景主持利穎怡(Joan)為五迷出頭,指當初定好咗「綠色箭咀」先至係龍頭,問點解照派畀龍頭前排隊嘅南亞裔人士,卻被職員話多管閒事:「你唔係排隊嘅,唔好出聲。」令觀眾都好憤慨。

利穎怡不滿五月天演唱會嘅售票安排。(電視截圖)

Joan接受《香港01》訪問時就指其實一班黃牛黨與粉絲同樣在24號開始排隊:「但佢哋唔係排頭位,我哋問返啲同學仔(指五迷),佢哋就話班黃牛黨好快就喺頭位之前放咗幾張紙皮喺度打尖,而啲職員就覺得打尖嘅人都係排咗咁多日,所以都應該畀籌佢哋,當咗佢哋先係真係排第一嘅人,無論佢哋係唔係打尖咁。我覺得件事真係好唔公平,當然打尖嘅南亞裔係有錯,但係最大問題係職員嘅判決,明明講好咗箭咀後先計數,點解無端端畀打尖嘅拎籌先。有人有異議,佢就話有人搗亂,話有人搗亂就唔派籌。」

利穎怡問箭咀前嘅人士知唔知自己等緊買咩飛,對方就話唔知。(電視截圖)

Joan坦言見到呢個情況之後就忍唔住為一班五迷發聲:「但其實心情都好複雜,我都好驚出咗聲之後,佢真係唔派籌,搞到害咗一班同學仔,之前都有類似嘅情況發生。(職員叫你唔好多事時係咪好嬲?)我都有諗係唔係我太多事,因為同學仔都唔敢出聲,我又覺得唔好再令同學仔遲咗入去,所以都唔再講啲咩。(有冇後悔咁樣據理力爭?)冇,我當時就係覺得點解冇人出聲先出聲,唔可以咁樣畀店員覺得自己係啱。」

利穎怡問呢位仁兄佢手上嘅公文袋係乜,呢位仁兄唔肯答,好多五迷就話袋裡面係黃牛黨畀打尖嘅人嘅錢同指示。(電視截圖)

對於黃牛黨嘅問題,Joan就認為實名制係唔錯嘅解決方法:「好多人都怪罪於南亞裔人士,但唔應該咁諗,因為就算係南亞裔人士、內地人、香港人又好,最大問題係打尖,今次只係咁啱係南亞裔人士。個售票制度真係出現好大問題,我哋已經同售票處職員講佢咁安排好有問題,但佢依然好執意派畀打尖嘅人,咁真係好唔妥。」

利穎怡認為今次嘅混亂係因為售票職員不公,將買飛嘅籌派畀打尖嘅人。(電視截圖)

《東張西望》片段截圖:

+11

利穎怡平時Post嘅靚相:

+2