林子善婚宴勁墟冚多星過台慶 楊怡羅仲謙手拖手出現苟姑娘最省鏡
撰文：李妍樺
出版：更新：
林子善今日與拍拖5年的圈外老婆Kary補辦婚禮，原來只打算筵席50圍，但因為人緣真係好到冇朋友，加開13圍到63圍，因為酒店個場已經冇晒位，仲有好多朋友想嚟都未必嚟到，好似黃子華個騷咁一位難求。不過子華今晚就唔會嚟，子善話師傅今朝已經喺電話祝福過佢：「佢前排因為賣飛嘅事搞到個人好唔開心，我都有安慰過佢，之前同佢Whatsapp由兩點傾到五點，佢心情都好返好多喇。其實男人之間都有愛情，就好似我同師傅咁，佢今日同我講咗唔嚟喇，話怕嚟到唔知攞景定贈慶咁，我哋兩個冇計呢啲嘢嘅。」
講起點解子善師傅黃子華唔嚟，子善就話之前師傅因為賣棟篤笑飛嘅事搞到好唔開心，所以怕嚟到唔知攞景定贈慶。（梁碧玲攝）
話林子善人緣好真係唔會錯，除咗朋友多到酒店都唔夠位放之外，號召力都相當驚人，TVB嘅藝人差不多係傾巢而出，好似台慶咁，例如KC歐瑞偉、呂慧儀、郭峰、陳法蓉都有嚟到，連啱啱同陸漢洋訂婚嘅苟芸慧都話要嚟取經，以前大家成日都話苟姑娘個身形臃腫，今日見佢突然瘦咗幾個碼，苟芸慧解釋係因為拍廣告辛苦到瘦咗，依家呢個細碼嘅苟姑娘真係冇得輸！
苟姑娘堅係靚。（梁碧玲攝）
之後有江美儀、蔣家旻、何浩文、韓瑪利、小儀跟住嚟，估唔到喺呢個場個見到楊怡同羅仲謙手拖手出現，楊怡聽到大家叫佢「羅太」笑到見牙唔見眼，好耐冇見過楊怡出現喺鏡頭前面。
阿羅生羅太就拖住手嚟嘅。（梁碧玲攝）
跟接著有袁文傑、田雞、敖嘉年，最搞笑就係徐榮同陳煒著係戲服趕嚟飲林子善呢餐，可以話係相當有誠意！每逢有婚宴就一定要有阿Bob同曾志偉呢兩個「千杯不醉」，但阿Bob 就話自己已經收山，只會飲到5，6成，大家又信唔信？跟住仲有黃心穎、曾志偉、胡楓、胡杏兒、黃日華、王君馨、岑麗香、吳岱融、吳卓羲、陶大宇、金剛、林子聰、李思捷、陳展鵬等人出現，總之就好多人，多到數唔晒，最後連樂小姐都嚟埋就係最好嘅Happy Ending。
今晚心穎BB都好靚。（梁碧玲攝）
好多星，九十幾張相，慢慢睇：
+59