【VR驅魔人】基界男神陳健朗林耀聲吻別搞喊觀眾：可以再大膽啲！

唔知大家有冇睇，但ViuTV《VR驅魔人》上星期播出嘅第四、五集真係好好睇，直頭係睇到眼濕濕，個故事就係講飾演黑社會大佬「孝哥」嘅吳浩康（Deep），想透過王貽興、劉翁（Sunny）開發嘅VR裝置，見返中學時期自殺死咗嘅小情人林耀聲，好想對方可以同佢唱埋淨低半首嘅《愛後餘生》。到最後林耀聲就錫咗吳浩康面珠一啖以作告別，而飾演「少年孝哥」嘅陳健朗亦代表咗孝哥嘅校園遺憾而接受咗呢下輕吻，仲喊到癲咗收唔到聲。好多人同我一樣都覺得好感動，仲有觀眾為陳健朗同林耀聲剪咗個《愛後餘生》MV，成件事好BL、好有愛。

新晉「Gay界男神」陳健朗就話最深刻都係K房嗰場戲：「阿聲為咗想同我親近啲，就拎我支煙想食，佢哄埋嚟嗰下真係好觸動到我。其實成個故事都好觸動到我，因為同性戀議題喺以前討論空間唔大，但愛情呢樣嘢係唔應該限於性別，係外來因素禁止你去釋放自己情感，阿Deep同阿聲唱返首歌，最後阿聲錫落去嘅場面就係呢種釋放。」至於林耀聲拍親密戲尷唔尷尬，佢就話同對方都好熟，所以都唔會好尷尬。

雖然同性戀題材成日喺大銀幕上見到，但點都係喺電視劇普及、未夠入屋，陳健朗就咁睇嘅：「係因為驚受眾接受唔到，但其實依家氣候開放咗好多，所以我覺得拍類似題材嘅劇可以大膽啲、再深入啲，以往喺劇集裡面講同性戀會比較負面，但其實可以寫真地拍，至於點睇就交畀觀眾決定。」

講到之前陳健朗喺奇妙電視劇集《熱戀100天》乸乸哋，依家喺《VR驅魔人》又做同性戀，問怕唔怕畀人定型時，佢就咁講嘅：「又唔怕嘅，每個角色都有好玩、值得消化嘅地方。」其實佢除咗係一個演員，其實仲係一個獨立電影導演，問佢有冇諗過執導同性戀題材嘅戲，佢就話之前已經諗咗個故事，不過暫時就放咗喺櫃桶，到適當時候就會拍：「依家忙緊拍王貽興嘅新劇《陽關道》，之後都會同談善言拍另一套戲，其實我仲搞緊自己嘅『首部劇情電影計劃』，改緊個劇本，講緊一個退役華籍英軍同南亞裔古惑仔嘅故事，係關於自我救贖嘅故事嚟。」

雖然陳健朗唔係啲典型靚仔，但係成個Package係好有味道嘅，唔怪得佢咁深受喜愛：